HATAW! D'yaryo ng Bayan hatawtabloid.com
TUGUEGARAO CITY – Boluntaryong sumuko sa mga awtoridad ang isang lalaki makaraan mapatay ang kanyang misis sa bayan ng Aparri, Cagayan kamakalawa.
Ayon kay Chief Insp. Pepito Mendoza, sinundo ng mister na si Demy Taloza, 52, ang kanyang misis na si Marites, 42, mula sa ibang bansa, noong Agosto 13.
Sinabi ni Mendoza, umuwi ang misis dahil gusto niyang makita ang kanyang anak na naka-confine sa ospital.
Pagkalipas ng ilang araw, niyaya ng mister ang misis na magtalik ngunit tumanggi ang misis at sinabi pang gusto na niyang makipaghiwalay.
Sa puntong ito, nagalit ang mister kaya binugbog at pinalo niya ng kahoy ang kanyang misis.
Nakatakbo pa ang misis sa labas ng kanilang bahay ngunit hinabol siya ng lalaki at pinagtataga.
Dinala sa pagamutan ang babae ng kanilang mga kapitbahay ngunit idineklara siyang dead on arrival ng mga doktor.
