Piolo, gagawa ng pelikula sa Regal

ANG saya-saya ni Mother Lily Monteverde sa nakaraang presscon ng That Thing Called Tanga Na dahil positibo ang reaksiyon ng entertainment press ng mapanood ang trailer ng pelikulang ipalalabas na sa Agosto 10.

Kumita kasi ang mga pelikulang ipinrodyus niya kamakailan kaya panay ang pasalamat niya sa mga tulong na ibinibigay sa mga pelikula niya tulad nitong huli na I Love You To Death na pinagbidahan nina Enchong Dee at Kiray Celis at ang naunang Love Is Blind.

At nagsabi siyang suportahan daw ulit ang pelikulang That Thing Called Tanga Na nina Angeline Quinto, Martin Escudero, Kian Cipriano, Billy Crawford, at Eric Quizon mula sa direksiyon ni Joel Lamangan na ipalalabas na sa Agosto 10.

“Tulungan mo pelikula ko ha,” lambing sa amin ni Mother Lily.

Bukod dito kaya maganda ang mood ng Regal matriarch ay dahil gagawa ng pelikula si Piolo Pascual sa Regal Entertainmment kasosyo ang Star Cinema at Spring Films.

Very refreshing daw ang pelikula dahil kukunan ito sa New Zealand at si Yen Santos ang leading lady ni Piolo na ididirehe naman ni Dondon Santos at kung walang magiging aberya ay nitong Agosto na ang alis para mag-shooting.

Maganda ang New Zealand dahil dito kinunan ang Lord of The Rings kaya excited ang lahat.

Dalawa naman ang naisip na titulo ng pelikula, ang Once In A Lifetime or Northern Lights pero mas gusto raw ni Mother Lily ang una.

FACT SHEET – Reggee Bonoan