Misis patay sa sakal ni mister (Ayaw makipagbalikan)

PATAY ang isang  misis makaraan sakalin ng kanyang mister bunsod nang matinding galit nang tumangging makipagbalikan sa kanya kamakalawa ng gabi sa Malabon City.

Kinilala ng pulisya ang biktimang si Samelyn Gonzales, 34, vendor, residente ng Block 10, Lot 37, Phase 2, Area 3, Dagat-Dagatan, Brgy. Longos ng nasabing lungsod.

Habang pinaghahanap ng mga tauhan ng Malabon City Police ang suspek na si Esteban Gonzales, 38, at residente ng Gov. Pascual St., Wawa, Brgy. Tangos, Navotas City.

Sa imbestigasyon nina PO3 Alexander Dela Cruz at PO2 Roldan Angeles, dakong 7:40 p.m. nang matagpuan ng kanyang anak na si Esmila Gonzales ang wala nang buhay na ina sa loob ng kanilang bahay.

Sa pagsisiyasat ng Scene of the Crime Operatives (SOCO), nakitang may marka nang pagkakasakal sa leeg ang biktima na naging dahilan ng kanyang pagkamatay.

Napag-alaman, huling nakitang buhay ang biktima dakong 3:00 pm habang kausap ang suspek na pilit nakikipagbalikan sa kanyang misis.

 ( ROMMEL SALES )