Tagumpay ng mga anak, ipinagmamalaki ng dating national athletes

Pi Durden Wangkay Naomi Marjorie Cesar Dakar YOG

DAKAR, Senegal — Hindi maikakaila ang saya at pagmamalaki nina Jonah Genilza at Ben Cesar sa tagumpay ng kanilang mga anak na sina Pi Durden Forward Wangkay at Naomi Marjorie Cesar sa 2026 Youth Olympic Games.

Kapwa dating pambansang atleta, may espesyal na kahulugan para kina Genilza at Cesar ang makitang mas mataas pa ang nararating ng kanilang mga anak kaysa sa kanilang sariling karanasan sa sports.

Si Genilza ang personal na gumagabay kay Wangkay, na nagwagi ng bronze medal sa men’s 200 meters, habang ang kanyang anak na si Naomi ay nag-uwi naman ng silver medal sa women’s 800 meters.

Ayon kay Genilza, labis ang kanyang pagmamalaki sa ipinakitang kakayahan ni Pi, lalo na’t dati pa nitong sinasabi na hihigitan niya ang mga nagawa ng kanyang ina.

“Proud ako sa lahat ng nagagawa ni Pi. Noong bata pa siya, sinabi na niyang mas gagalingan niya ang mga nagawa ko. Ngayon, nasa Youth Olympics na siya at mayroon na siyang bronze medal,” pahayag ni Genilza.

Ganoon din ang nararamdaman ni Cesar, na naging bahagi ng national team mula 1991 hanggang 1997 at nakasali sa ilang edisyon ng Southeast Asian Games.

“Gusto ko talagang mahigitan ng mga anak ko ang mga nagawa ko. Ang pinakamahalaga ay nakikita kong nararating nila ang ganitong antas,” ani Cesar.

Hindi rin malilimutan ng dalawang magulang ang kanilang karanasan sa Dakar, lalo na ang matinding kaba at pananabik habang pinapanood ang kani-kanilang anak sa kompetisyon.

Aminado si Genilza na halos mawalan siya ng boses sa kakasigaw at pagsuporta kay Pi mula sa grandstand.

Samantala, masaya rin si Cesar dahil hindi lamang para sa sarili ang pangarap ni Naomi kundi para rin sa mga kabataang nangangarap na makasunod sa kanyang yapak.

Kapwa rin nila kinilala ang natural na pagkahilig ng kanilang mga anak sa sports.

Ikinuwento ni Genilza na sinubukan muna ni Pi ang swimming at football bago tuluyang piliin ang athletics. Binigyan niya ito ng kalayaang pumili ng larangang gusto nitong tahakin.

Si Naomi naman ay nahilig din sa track and field matapos subukan ang iba’t ibang sports, kabilang ang football.

May mahalagang mensahe rin ang dalawang dating atleta para sa mga magulang at kabataang nangangarap na magtagumpay sa sports.

“‘Wag sumuko. Noong nagsisimula pa lang si Pi, hanggang semifinals lang siya. Paglaon, nakapasok na sa finals hanggang sa maging medalist. Sa mga magulang, suportahan ninyo ang inyong mga anak dahil napakahalaga ng inyong suporta para maabot nila ang kanilang mga pangarap,” ani Genilza.

“‘Wag matakot mangarap. Sa pamamagitan ng pagsisikap, posible ang lahat. Sa mga magulang, hindi mangyayari ang mga ganitong tagumpay kung wala kayo,” dagdag ni Cesar.

Nagpasalamat din sina Genilza at Cesar sa Philippine Olympic Committee president Abraham “Bambol” Tolentino, Philippine Sports Commission chairman Patrick “Pato” Gregorio at Philippine Athletics Track and Field Association president Terry Capistrano sa patuloy na suporta sa kanilang mga anak at sa buong Philippine sports community. (POC Media Pool/HNT)