ni TEDDY BRUL, Jr.
MANDALUYONG CITY — Ikinasal noong Martes, 8 Setyembre 2026, ang FPJ Panday Bayanihan Party-list Representative na si Brian Poe Llamanzares at Department of Justice (DOJ) Undersecretary Margarita Gutierrez sa Santuario de San Jose sa Mandaluyong City.
Pinagsama ng seremonya ang pamilya, malalapit na kaibigan at mga kasamahan ng bagong mag-asawa sa pamahalaan at pampublikong buhay.
Makabuluhan para sa pamilya Poe ang piniling simbahan dahil dito rin ikinasal ang mga lolo’t lola ni Brian na sina Fernando Poe, Jr. at Susan Roces.
Si Brian ay panganay at nag-iisang anak na lalaki ni dating Senadora Grace Poe. Siya rin ang apo nina FPJ at Susan Roces.
Kabilang sa mga miyembro ng pamilya na dumalo sina aktres Lovi Poe at celebrity DJ Ronnian Poe, tiyahin at tiyuhin ni Brian.
Si Margarita naman ay anak ni dating Ombudsman at dating Justice Secretary Ma. Merceditas Gutierrez. Isang abogado, nagsisilbi siya ngayon bilang opisyal sa Department of Justice.
Kabilang sa mga dumalo sa kasal sina First Lady Liza Araneta Marcos, Senador Tito Sotto, dating Senador Franklin Drilon, Manila Mayor Isko Moreno, at Quezon City Mayor Joy Belmonte.
Naroon ang mga kasamahan ni Brian sa House of Representatives, kabilang sina Speaker Bojie Dy, Majority Floor Leader Sandro Marcos, at mga kinatawan na sina Bong Teves, Gina de Venecia, Florabel Yatco, Toby Tiangco, Rachel Arenas, Mark Cojuangco, Audrey Zubiri, Javi Benitez, at Ryan Recto.
Dumalo rin ang aktor na si Coco Martin at aktres Julia Montes.
Kapuwa lumaki sina Brian at Margarita sa mga pamilyang may malalim na ugnayan sa serbisyo publiko.
Bago ang kanilang kasal, pinili rin ng mag-asawa na bigyang-pansin ang mga estudyanteng nangangailangan ng suporta. Naglaan sila ng educational assistance sa mga kabataang benepisyaryo at ipinaalala ang kahalagahan ng pagkakaroon ng taong naniniwala sa kanilang kakayahan at mga pangarap.
Para sa mag-asawa, ang paglilingkod ay hindi lamang tungkol sa kanilang mga posisyon sa gobyerno kundi tungkol din sa pagtulong sa mga taong nangangailangan ng pagkakataon at suporta.
Ang kanilang kasal ay nagsilbing pagsasama hindi lamang ng dalawang pamilya kundi ng dalawang taong kapuwa may karanasan at paninindigan sa serbisyo publiko.
Sa pagsisimula ng kanilang buhay bilang mag-asawa, dala nina Brian at Margarita ang kanilang sariling mga karanasan sa paglilingkod, isang pagpapahalagang matagal nang bahagi ng kanilang mga pamilya at nais nilang ipagpatuloy sa panibagong yugto ng kanilang buhay.
