MA at PA
ni Rommel Placente
IKINUWENTO ni Ruru Madrid sa isang episode ng podcast ni Bianca Umali na Simply, B Podcast na may titulong Paano Ako Natutong Magmahal.
Sinabi rin ni Ruru na unti-unti siyang natutong maniwala na may taong talagang nakalaan para sa bawat isa.
Sabi ni Ruru, “’Di ba dati parang ‘yung mga matatanda, may kasabihan na mahahanap mo rin ‘yung katapat mo. ‘Di ba laging may ganoon, so roon ko napatunayan na totoo pala talaga ‘yun.”
Aminado rin si Ruru na isa siyang hopeless romantic, pero noong mas bata pa siya ay hindi niya inakalang darating ang puntong gugustuhin niyang makasama ang iisang babae habambuhay.
Nagbago ang lahat nang makilala niya si Bianca.
“Noong nakilala kita, kung paano ka mag-alaga, hindi dahil nasa podcast tayo ngayon at sinasabi ko ‘to. Pero totoo ‘yun, parang every time na ikinukwento ko rin sa mga kaibigan ko, sa pamilya ko, mayroon talagang darating sa buhay mo na magpapabago ng pananaw mo sa buhay,” pagtatapat niya.
Para kay Ruru, hindi lang basta pagiging maalaga ni Bianca ang nakapagpaiba sa kanyang pananaw.
Habang mas nakikilala niya ang girlfriend, mas naging malinaw sa kanya kung anong klaseng pagmamahal at relasyon ang gusto niya.
“Bilang isang tao, mararamdaman mo na lang na ito ‘yung gusto kong makasama habambuhay.
“Pero ayun nga, binago mo. Binago mo kung sino ako. Binago mo kung paano ko tingnan ang pag-ibig, ang pagmamahal,” mensahe pa ni Ruru kay Bianca.
