MA at PA
ni Rommel Placente
INIINTRIGA ang pagkalas ni Aiko Melendez sa pangangalaga ni Ogie Diaz.
Mayroong nagkokomento na may kinalaman sa politika ang paghihiwalay nila ng landas – kilalang supporter ng mga Duterte si Aiko habang konektado naman si Ogie sa kampo ni dating Vice President Leni Robredo.
Ayon sa ilang netizens, may ilang isyu raw na hindi naresolba nina Aiko at Ogie kaya nagdesisyon silang tapusin na ang kanilang ugnayan bilang talent-manager.
Pero ipinagdiinan ng aktres at politiko na wala silang samaan ng loob ni Ogie at kahit hindi na ito ang manager niya ay nananatili pa rin ang kanilang pagkakaibigan.
“Inuulit ko po ahh di kami magka away ni mader Ogie Diaz,” ang post ni Aiko sa kanyang social media account.
“In fact nirekomenda ko pa isang kaibigan ko na siya kuhain manager so wala dahilan para magiba pagkakaibigan namen. Mahal ko yan walang magbabago,”aniya pa.
Nagbigay na rin ng pahayag si Ogie tungkol sa pag-alis ni Aiko sa kanyang talent management at ipinagdiinan din niya na maayos ang naging pagtatapos ng kanilang professional relationship.
“Normal ’yan sa manager-talent relationship. And Kuya Boy knows that bilang pareho kaming manager. Importante, i-save ang friendship,” ang paliwanag ni Ogie base sa ipinadala niyang mensahe sa Fast Talk with Boy Abunda.
