Chiz Escudero, batas at prinsipyo tinutungtungan sa pamamahala sa impeachment trial kay VP Sara
AKSYON AGAD
ni Almar Danguilan
SA BAWAT ARAW ng impeachment trial kay Vice President Sara Duterte, mas nasusubok ang kakayahan ni Senator Chiz Escudero bilang Presiding Officer. Habang dumarami ang mga legal na isyung kailangang resolbahin, dumarami rin ang mga eksperto at personalidad na nagsasabing maayos ang kanyang pamamahala sa proceedings.
Isa sa mga pinakamainit na usapin kamakailan ay ang naging desisyon ni Escudero na payagan ang pag-subpoena sa ilang dokumentong may kaugnayan sa kaso. Dito tumutol si dating presidential legal counsel Salvador Panelo, na isa sa pinakamadalas pumuna sa mga ruling ng Presiding Officer.
Ngunit inilinaw ni Escudero na ang pagpapalabas ng mga dokumento ay hindi nangangahulugang awtomatiko na itong magiging ebidensiya laban kay Vice President Sara. Bahagi lamang ito ng proseso upang maipresenta ang mga dokumento sa impeachment court. Nananatili ang karapatan ng defense panel na kuwestiyonin ang admissibility, relevance, at maging ang paraan ng pagkuha rito.
Ipinapakita nito na sa bawat ruling, binibigyan pa rin ng pagkakataon ang magkabilang panig na ihain ang kanilang mga argumento. Ito rin ang dahilan kung bakit marami ang naniniwalang nananatiling patas ang pamamahala ni Escudero sa paglilitis.
Bago pa man magsimula ang impeachment trial, sinabi na ni Senator Panfilo Lacson na mahalagang abogado ang mamumuno sa proceedings dahil kinakailangang mabilis na makapagpasya sa mga legal at procedural issues. Sa mga nagdaang pagdinig, tila nakita ng marami ang kahalagahan ng ganitong karanasan.
Patuloy rin dumarami ang mga positibong komento mula sa iba’t ibang sektor. Nagbigay ng “high grades” si retired Supreme Court Justice Adolfo Azcuna, habang nagpahayag din ng magagandang obserbasyon sina constitutional law professor Tony La Viña, writer Katrina Stuart Santiago, lead House prosecutor Gerville Luistro, at defense spokesperson Atty. Michael Poa tungkol sa naging takbo ng impeachment trial.
Naging usap-usapan ang biro ng isang netizen na tila na-“software update” si Escudero. Ngunit simple ang naging sagot ng senador: “No upgrade, just the same principle and stance regarding adherence to what the law says.”
Maging si dating Senate President Franklin Drilon ay nagsabing naging decisive ang pamumuno ni Escudero at posibleng matapos ang impeachment trial bago matapos ang taon.
Natural lamang na may mga hindi sang-ayon sa ilang ruling ng Presiding Officer. Ngunit iba ang pagtutol sa isang partikular na desisyon sa paghusga sa kabuuang paraan ng pamamahala sa paglilitis.
Sa ngayon, para sa maraming eksperto at tagamasid, nananatiling maayos, organisado, at naaayon sa batas ang direksiyong tinatahak ng impeachment court sa ilalim ni Senator Chiz Escudero.
