Fiel Reyes wagi ng ginto sa World Taekwondo Expo
KATUPARAN ng Isang pangarap na debut sa international stage ang naitala ng Filipina taekwondo jin na si Fiel Reyes matapos magwagi ng gintong medalya sa poomsae at pilak sa sparring sa ika-19 na World Taekwondo Culture Expo na ginanap sa Muju, Jeollabuk-do, South Korea mula Hulyo 16 hanggang 21.
Ipinakita ng 21-anyos na estudyante ng Mapua University-Makati ang kanyang husay sa unang pagsabak sa isang pandaigdigang torneo. Nasungkit niya ang gintong medalya sa poomsae bago sinundan ito ng pilak sa kyorugi o sparring, patunay ng kanyang talento at determinasyon laban sa mga pinakamahusay na taekwondo jins mula sa iba’t ibang bansa.
Higit pa sa pagwawagi ng dalawang medalya, naging mahalagang hakbang ang kanyang unang international competition sa paghubog ng kanyang karera bilang atleta. Kilala bilang isang mahusay na poomsae practitioner, pinili ni Reyes na subukan din ang sparring—isang hamong matagumpay niyang nalampasan sa pag-uuwi ng silver medal.
Itinuturing ang World Taekwondo Culture Expo bilang pangunahing international taekwondo festival ng South Korea, na dinadaluhan ng mahigit 4,000 atleta, coach, at mga mahilig sa taekwondo mula sa iba’t ibang panig ng mundo. Tampok dito ang mga kompetisyon sa poomsae at kyorugi, kasabay ng pagtataguyod ng kulturang Koreano, turismo, at mga pagpapahalagang isinusulong ng taekwondo.
Bukod sa mga laban, tampok din sa expo ang mga pagtatanghal pangkultura, industry exhibitions, educational seminars, demonstrasyon ng Korean National Taekwondo Demonstration Team, at mga cultural tour na nagbibigay sa mga kalahok ng pagkakataong maranasan ang mayamang kultura at pinagmulan ng taekwondo.
Sa ika-19 na edisyon nito, lalo pang pinagtibay ng World Taekwondo Culture Expo ang reputasyon bilang isa sa pinakamalalaking pagtitipon ng mga taekwondo practitioner sa buong mundo, kung saan nagkakaroon ng pagkakataon ang mga kalahok na makipagpalitan ng kaalaman, hasain ang kanilang kakayahan, at maranasan ang bansang pinagmulan ng kanilang isport.
“Binabati ka namin, Fiel! Ipinagmamalaki ka ng iyong pamilya at ng buong Pilipinas. Mabuhay ka! Nawa’y patuloy mong maging inspirasyon ang mga kabataang atleta na mangarap nang mas mataas, magsikap nang mas husto, at huwag matakot na harapin ang mga bagong hamon,” pahayag nina World Olympics Taekwondo Foundation Philippines Chairman Isagani Domingo at Vice Chairperson Elisabella Domingo. (HNT)
