MATABIL
ni John Fontanilla
MARAMI ang kinilig sa muling pagkikita ng magkaibigan, magkalaro, at nagkasama sa pelikula na sina Ryzza Mae Dizon at Bimby Aquino.
Naging espesyal na panauhin si Bimby sa isang segment ng Eat Bulaga, ang The Age is Right sa mismong selebrasyon ng kaarawan ni Ryzza sa Eat Bulaga.
Grabe ang hiyawan at kilig na naramdaman ng mga tao sa studio maging ang mga taong nanonood sa kani-kanilang bahay, habang kinakanta ni Bimby ang Maybe This Time at ipinakikita si Ryzza na pangiti-ngiti.
At nang interbyuhin na nila si Bimby ay sabay inalala nina Ryzza at bunsong anak ni Kris Aquino ang hindi nila malilimutang karanasan habang ginagawa ang pelikulang pinagsamahan, ang 2013 MMFFmovie na My Little Bossings.
Mas maraming kinilig at umingay ang loob ng studio nang kantahin nila ulit ang Pusong Bato na paborito nilang kinakanta noon.
Isang necklace naman ang regalo ni bimby kay Ryzza na ito mismo ang nagsuot.
Ayon nga sa mga netizen, bagay na bagay na magka-loveteam ang dalawa. Kaya hiling ng mga netizen na pagsamahin sina Ryzza at Bimby sa Eat Bulaga.
