HATAW! D'yaryo ng Bayan hatawtabloid.com
SUMUGOD ang grupong Sandugo sa senado sa pangunguna ng isang Ka Jet Gonzaga upang ipanawagan sa mga senador na ipagpatuloy ang impeachment laban kay Vice President Sara Duterte upang papanagutin sa kanyang mga ginawang pagkakamali lalo ang paglustay sa pera ng bayan sa loob lamang nang ilang araw.
Ayon kay Ka Jet, marapat makakuha ng sapat na hustisya ang bawat mamamayan sa ginawa ng bise presidente.
Bukod sa pagpapakita sa impeachment ay nanawagan din si Ka Jet kay Senador Ronaldo “Bato” Dela Rosa na isuko na ang kanyang sarili sa batas.
Habang patungo sa senado ang grupo ng Sandugo para sa isang kilos protesta ay sinalubong sila ng mga Pro-Duterte group at tinangkang wasakin ang kanilang mga hawak-hawak na placards.
Sa kabila nito, pilit na umiwas ang grupo at nakinig sa payo ng mga awtoridad na lumipat ng lugar na pagdarausan ng tahimik na kilos protesta.
Nanindigan si Ka Jet na suportado nila ang kasalukuyang administrasyon lalo ang mga programa nito para sa bayan at mamamayan.
Naniniwala si Ka Jet na ang sinumang nagkasala ay dapat managot sa ating batas at pagbayaran ang bawat kasalanan niya lalo kung ang pera ng taong bayan ang nakataya o nilustay. (NIÑO ACLAN)
