HATAW! D'yaryo ng Bayan hatawtabloid.com
DALAWANG hinihinalang tulak ng ilegal na droga ang naaresto ng pinagsanib na puwersa ng Doña Remedios Trinidad Municipal Police Station, Pulilan MPS, at Provincial Drug Enforcement Unit sa ikinasang buy-bust operation sa Brgy. Cutcot, Pulilan, Bulacan nitong Mayo 10, 2026.
Batay sa ulat na isinumite ni PCpt Marc Henry SJ Gonzales, hepe ng DRT MPS, kinilala ang mga naarestong suspek na isang 48-anyos na businessman at 56-anyos na businesswoman, kapwa residente ng Brgy. Barangka, Baliwag, Bulacan.
Nakumpiska mula sa mga suspek ang tinatayang 300 gramo ng hinihinalang shabu na may tinatayang halaga na humigit-kumulang sa Php 2,040,000.00.
Narekober din ang buy-bust money na isang libong piso, labindalawang piraso ng boodle money, isang kahon ng Royce Potato Chip Chocolate, at isang berdeng Toyota Vios.
Ang mga naarestong suspek at mga nakumpiskang ebidensya ay dinala sa DRT MPS para sa kaukulang dokumentasyon at pagsasampa ng kasong paglabag sa Sections 5, 11, at 26, Article II ng Republic Act 9165 o Comprehensive Dangerous Drugs Act of 2002.
Ayon kay PColonel Jay B Baybayan, officer-in-charge ng Bulacan Police Provincial Office, patuloy nilang paiigtingin ang kampanya laban sa ilegal na droga upang maprotektahan ang mamamayan laban sa masamang epekto nito. (MICKA BAUTISTA)
