HATAW! D'yaryo ng Bayan hatawtabloid.com
ISANG 25-anyos lalaking iniulat na nawawala sa sunog
ang natagpuang patay sa loob ng kanyang silid na pinaniniwalaang nakulong sa loob ng nasusunog na bahay sa lungsod ng Parañaque, nitong Sabado ng hapon, 9 Mayo.
Natagpuan ang labi ng biktima ng mga nagrespondeng bombero sa loob ng kaniyang silid nang tuluyang maapula ang sumiklab na apoy pasado 5:00 ng hapon kamakalawa.
Ayon kay SFO3 Giovanni Corbes, imbestigador ng BFP Parañaque, kakulangan sa hangin o suffocation ang tinitingnang sanhi ng kamatayan ng biktima na pinaniniwalaang natutulog nang maganap ang insidente.
Dagdag ni SFO3Corbes, posible rin sa silid ng biktima nagmula ang apoy.
Nabatid na pitong oras nang hinahanap at tinatawagan ng kaniyang pamilya ang biktima ngunit bigo silang matagpuan siya.
Sa pagtataya ng barangay, hindi bababa sa 12 bahay ang tinupok ng sunog na umabot sa ikalawang alarma, habang nasa 15 pamilya o 45 indibiduwal ang nawalan ng tirahan.
Kasalukuyang nasa sa kalapit na covered court ng barangay hall pansamantalang nanunuluyan ang mga apektadong residente.
Tinatayang nasa P270,000 ang halaga ng pinsalang iniwan ng sunog, na patuloy na iniimbestigahan ng mga awtoridad.
