HATAW! D'yaryo ng Bayan hatawtabloid.com
CAPAS, TARLAC — Sentro ng atensyon ngayong weekend ang tagisan ng mga pinakamahusay na junior swimmers ng bansa sa National Open Championships sa world-class na New Clark Aquatics Center.
Tampok ang mga medalist mula sa iba’t ibang regional championships, kasama ang mga foreign-based na Filipino swimmers, sa kompetisyon na magsisilbing opisyal na selection process para sa Philippine Junior Team. Ang mga makakaabot sa bronze medal SEA Age qualifying standards ng nakaraang taon ay magkakamit ng puwesto sa koponan na isasalang sa ilang international tournaments ngayong taon, kabilang ang prestihiyosong Southeast Asian Age-Group Championships sa Singapore.
Binigyang-diin ni Philippine Aquatics, Inc. (PAI) Secretary General at swimming icon na si Eric Buhain ang kahalagahan ng ganitong mga kompetisyon sa paghubog ng talent ng mga Kabataang Pinoy.
“Ang grassroots development ang nananatiling pundasyon ng aming programa,” ani ng two-time Olympian at Philippine Sports Hall of Fame awardee. “Ang mga kaganapang tulad ng National Open ay nagbibigay sa ating mga batang swimmers ng pagkakataong makipagkumpitensya sa mataas na antas at ihanda sila sa hamon ng international competition. Dito natin natutukoy at nade-develop ang mga susunod na pambansang atleta.”
Mangunguna sa hanay ng mga kalahok sa event na suportado ng Philippine Sports Commission, Speedo, at MVP Sports Foundation ang 16-anyos na si Kyla Bulaga, ang pinakabatang miyembro ng Philippine team sa nakaraang Southeast Asian Games. Inaasahan niyang makakaharap ang matinding kompetisyon mula sa Most Outstanding Athlete ng National Academy of Sports na si Rhianna Coleman at sa rising star ng Southern Visayas na si Kacie Gabrielle Tionko.
Para kay PAI President Miko Vargas, higit pa sa isang selection meet ang kampeonato—ito ay bahagi ng mas malawak na layunin na palakasin ang pundasyon ng swimming sa Pilipinas.
“Nakatuon kami sa pagbuo ng isang sustainable system na nagsisimula sa grassroots level,” ani Vargas. “Sa pamamagitan ng pagsasama-sama ng pinakamahusay na batang swimmers mula sa iba’t ibang panig ng bansa, hindi lamang namin itinataas ang antas ng kompetisyon kundi tinitiyak din na ang oportunidad ay bukas sa lahat ng may talento at dedikasyon.”
Samantala, inihayag ni PAI Executive Director Anthony Reyes ang isang estratehikong pagbabago sa kalendaryo ng federation, kung saan kinansela ang lahat ng regional open swimming competitions. Sa halip, tutungo agad ang mga aktibidad sa PAI Open Water Swimming Championship Tryouts na gaganapin sa Hunyo 5-7 sa New Coast Boracay sa Aklan.
“Ginawa ang desisyong ito bilang konsiderasyon sa kasalukuyang sitwasyong pang-ekonomiya upang mas masuportahan ang ating mga swimmers at kanilang mga pamilya,” paliwanag ni Reyes, at idinagdag na layunin ng hakbang na ito na gawing mas simple ang mga kompetisyon habang binabawasan ang gastusin ng mga kalahok. (PAI/HNT)
