HATAW! D'yaryo ng Bayan hatawtabloid.com
SA gitna ng kasalukuyang pandaigdigang krisis, nananatiling kaiga-igaya na destinasyon ang bansa para sa mga dayuhan, na humihikayat ng halos 1,000 karateka mula sa 56 na bansa para sa Karate Youth League One Philippine leg na inihahandog ng Philippine Sports Commission mula Mayo 14 hanggang 17 sa Mall of Asia Arena sa Pasay City.
“Inaasahan namin ang mas maraming kalahok at bansa na lalahok sa Karate Youth League Manila leg ngunit ang kasalukuyang tensyon sa Middle East ay nakapigil sa ilang bansa na dumalo,” ayon kay Samahang Karate ng Pilipinas Federation, Inc. president Richard Lim.
Dagdag ni Lim, may 140 referees at judges mula sa 50 bansa ang dadalo rin upang pangasiwaan ang teknikal na aspeto ng pandaigdigang torneo na kinikilala ng World Karate Federation.
Itinuturing ng WKF ang Karate Youth League One bilang “pinakamalaking pandaigdigang pagdiriwang ng youth karate, na pinagsasama-sama ang libu-libong batang atleta mula sa iba’t ibang panig ng mundo.”
“Ngunit sa kabila ng mga hamong ito, isa pa rin itong napakalaking turnout para sa torneo, at handa kaming ilatag ang red carpet at ipakita ang kilalang Filipino hospitality sa kanilang lahat,” diin ng pinuno ng karate at global youth karate festival na sinusuportahan din ng Philippine Olympic Committee at SM Group of Companies.
Ikinatuwa ni PSC chairman Patrick “Pato” Gregorio ang napakalaking partisipasyon sa apat na araw na kompetisyon, na binigyang-diin ang isa sa mga pangunahing proyekto para sa 2026 ng National Sports Tourism Inter-Agency Committee na itinatag noong nakaraang taon ni Pangulong Ferdinand “Bongbong” Marcos Jr., na siya ring pinamumunuan niya.
“Pakitandaan na ang mga batang karateka mula sa iba’t ibang panig ng mundo ay magdadala rin ng kanilang mga pamilya kaya’t maaari ninyong asahan na doble o triple ang bilang ng mga dayuhan na darating upang maranasan ang kagandahan ng ating bansa,” ani Gregorio.
“Kapag narito na sila, inaasahan kong ang ilan o karamihan sa kanila ay maglalaan ng oras — at gagastos — upang manatili nang mas matagal at tuklasin ang maraming atraksyon na iniaalok ng ating bansa.”
“Tulad ng lagi naming sinasabi saan man kami magpunta at magkaroon ng pagkakataon, kung maayos na maisasagawa, nananatiling isang malaking tagapagpasigla ng ekonomiya ng ating bansa ang sports tourism,” dagdag pa niya.
“Kaya nais naming batiin si Lim at ang kanyang koponan nang maaga para sa kanilang masusing paghahanda upang matiyak na magiging matagumpay ang Karate Youth League One,” pahayag ng PSC chief tungkol sa event na sinusuportahan din ng Milo, Lansons Place at Citadines Bay City Manila.
Binanggit din ni Gregorio ang kahalagahan ng pagho-host ng event sa pagpapaunlad ng karate sa grassroots level sa pamamagitan ng pagbibigay ng pagkakataon sa mga lokal na atleta at coach na masaksihan ang mataas na antas ng performance ng mga promising karateka mula sa iba’t ibang panig ng mundo.
May kabuuang 31 kategorya sa kumite (sparring) at kata (forms) ang paglalabanan sa nasabing karate extravaganza, mula Under-14 (edad 12 hanggang 13), Cadets (edad 14 hanggang 15), at Junior (edad 16 hanggang 17) para sa parehong boys at girls divisions. (PSC/HNT)
