HATAW! D'yaryo ng Bayan hatawtabloid.com
HATAW News Team
HINDI nakaligtas sa kamatayan kahit naitakbo pa sa ospital ang minsang tinaguriang ‘Pinoy Bugsy’ na si Ceferino (a.k.a. Perry) Mariano, 75 anyos, nang tambangan ng riding-in-tandem sa kanto ng Timog Avenue at EDSA, sa Quezon City, kahapon ng hapon, Martes, 28 Abril.
Ganoon din ang sinapit ng kanyang driver na si Norberto Orimaco, 51, na una’y malubhang nasugatan sa ambush ngunit namatay din sa ospital.
Sa inisyal na ulat ng Criminal Investigation and Detection Unit ng Quezon City Police District (CIDU-QCPD), pasado 3:00 ng hapon kahapon nang sumulpot ang dalawang suspek na sakay ng motorsiklo at pinaulanan ng bala ang puting Suzuki, may plakang NLE 4839 sakay si Mariano, sa kanto ng Timog Ave, patawid sa EDSA.
Base sa mga nakitang kuha ng CCTV, nang makitang kapwa duguan ang sakay ng SUV, agad na tumakas ang mga suspek habang isinugod ang mga biktima sa East Avenue Medical Center (EAMC) na noong una’y sinabing nasa kritikal na kondisyon ngunit paglaon ay namatay din.
Hindi muna inilabas ng pulisya ang pangalan ng mga biktima dahil kailangan muna nilang ipaalam sa pamilya.
Patuloy ang imbestigasyon ng pulisya para alamin ang motibo sa ambush at sinusuri na rin ang mga CCTV sa lugar sa posibleng pagkakakilanlan ng mga suspek.
Narekober sa pinangyarihan ang 12 basyo ng kalibre .45 baril.
Viral ngayon sa social media ang video grab mula sa insidente.
Base sa mga naglabasang paskil ng mensahe ng pakikiramay sa social media, si Mariano ay kilala bilang dating presidente ng Association of Club, Karaoke, Disco Owners (ACKDO).
Sa panahong ito, bukod sa Roxas Blvd. sa bahagi ng mga lungsod ng Pasay at Parañaque, kinilala rin ang Quezon City bilang sentro ng entertainment.
Inihalintulad at binansagang Pinoy Bugsy si Mariano bilang paghahalintulad kay Benjamin “Bugsy” Siegel, ang nasa likod ng pag-unlad ng Las Vegas Strip sa Clark County, Nevada, USA.
Ayon kay Marlon Bernardino, isang sports writer at chess genius, bago ang pagkamatay ni Mariano itinatag niya ang Bugsy Promotion para tumuklas ng mga bagong billiard players, alalayan sila, at suportahan. Kabilang sa kanila sina Dennis Orcullo, Antonio Gabica, Roberto Gomez, Ronnie Alcano, Jeffrey de Luna, Jeffrey Ignacio, Jharome Peña, Carlo Biado, Johann Chua, Jerico Banares, Jonas Magpantay, at iba pa.
Wala pang opisyal na pahayag ang pamilya ukol sa pagpaslang sa kanilang 75-anyos padre de familia, habang nagpapatuloy ang imbestigasyon ng mga awtoridad. (May kasamang ulat ni ALMAR DANGUILAN)
