HATAW! D'yaryo ng Bayan hatawtabloid.com
MATAGUMPAY na naaresto ng mga awtoridad ang isang lalaking sangkot sa kasong carnapping at paglabag sa anti-fencing law sa isinagawang follow-up at entrapment operation sa Brgy. Poblacion, sa bayan ng Guiguinto, lalawigan ng Bulacan, nitong Linggo ng hapon, 26 Abril.
Sa ulat na isinumite ni P/Lt. Col. Nelson Sardin, hepe ng Pandi MPS, kinilala ang suspek na isang 25-anyos online seller, residente sa Brgy. Bambang, Bulakan, Bulacan.
Isinagawa ang operasyon kasunod ng iniulat na carnapping ng motorsiklo mula sa isang 40-anyos complainant na residente sa Brgy. Cupang, Pandi, Bulacan.
Matapos matanggap ang ulat, agad nagsagawa ng follow-up operation ang Pandi MPS na nagresulta sa pagkakaaresto ng suspek.
Nabawi sa suspek ang ninakaw na motorsiklo, isang kulay itim na Suzuki Skydrive, may plakang 645TZD, na nakarehistro sa pangalan ng biktima.
Ang nasabing motorsiklo ay may kaukulang dokumento ng bentahan, ngunit napag-alamang ito ay may kinalaman sa naunang naiulat na carnapping incident.
Agad na dinala ang suspek sa Pandi MPS para sa kaukulang dokumentasyon at disposisyon, habang inihahanda ang pagsasampa ng kasong paglabag sa Presidential Decree 1612 (Anti-Fencing Law) at RA 10883 (New Anti-Carnapping Act) laban sa kaniya.
Muling pinagtibay ng Bulacan PPO sa pamumuno ni P/Col. Jay Baybayan, officer-in-charge, ang mas pinaigting na kampanya laban sa mga krimeng may kaugnayan sa pagnanakaw ng sasakyan. (MICKA BAUTISTA)
