HATAW! D'yaryo ng Bayan hatawtabloid.com
NAARESTO ng pinagsanib na puwersa ng pulisya ang No. 7 most wanted person (municipal level) ng San Rafael, Bulacan sa bisa ng warrant of arrest sa Brgy. Baluarte, Gapan City, Nueva Ecija kamakalawa.
Ayon sa ulat ni PLt. Colonel Protom E. Guevarra, hepe ng San Rafel MPS, kinilala ang akusado na isang 46-anyos, residente sa Brgy. Diliman I, San Rafael, Bulacan.
Dakong 8:45 ng umaga nang madakip ng mga operatiba ng San Rafael Municipal Police Station katuwang ang Regional Special Operation Group 3 at Minalin MPS ng Pampanga Police Provincial Office ang suspek.
Ang pag-aresto ay isinagawa sa bisa ng warrant of arrest sa kasong Qualified Theft na may 27 bilang ng kaso, inisyu ni Judge Elenita N.E. Macatangay-Alviar, Presiding Judge ng RTC Branch 121, Meycauayan, Bulacan noong 6 Pebrero 2026.
Sa kasalukuyan, ang akusado ay nasa kustodiya ng San Rafael MPS para sa kaukulang dokumentasyon at disposisyon.
Patuloy ang pinaigting na operasyon ng Bulacan Police Provincial Office sa pamumuno ni PColonel Jay B. Baybayan, Oficer-In-Charge, laban sa mga most wanted na personalidad upang matiyak ang agarang pagdakip sa mga lumalabag sa batas at maibigay ang hustisya sa mga biktima. (MICKA BAUTISTA)
