HATAW! D'yaryo ng Bayan hatawtabloid.com
MULING nanawagan si House Assistant Majority Leader Brian Poe ng FPJ Panday Bayanihan Party-list sa mga transport network vehicle service o TNVS companies na ibaba ang kanilang revenue-sharing commissions sa isinagawang pagdinig ng LEAD Joint Committee, binibigyang-diin ang agarang pangangailangang pangalagaan ang kapakanan ng mga rider at tiyakin ang mas makatarungang kita sa gitna ng patuloy na pagtaas ng presyo ng gasolina.
Sa interpelasyon, itinampok ni Poe ang hindi pagkakatugma ng mga naunang pangako ng mga platform at ang aktuwal na komisyon na ipinapakita sa mga isinumiteng datos ng mga rider. “May mga resibo kami para patunayan ito,” ani Poe, na tumutukoy sa mga screenshot mula sa mga rider ng Joyride, Move It, Angkas, at Grab na nagpapakitang nananatili pa rin sa 20% hanggang mahigit 23% ang komisyon, taliwas sa mga naunang pahayag na ito ay nabawasan na.
Binigyang-diin niya na ang mga natuklasang ito ang nagtulak sa Komite na humingi ng malinaw na paliwanag mula sa bawat platform, “hindi para sa akin, kundi para sa inyong mga rider.”
Ayon kay Rep. Poe, ang kasalukuyang tiered commission system ay pabor sa mga rider na may mataas na bilang ng biyahe ngunit dehado ang mga part-time driver, kabilang ang mga solo parent na umaasa lamang sa paminsan-minsang pasada para madagdagan ang kita.
Hinikayat niya ang mga platform tulad ng Joyride, Angkas, Move It, at Grab na magpatupad ng pansamantala at pare-parehong pagbaba ng komisyon, at iginiit na kahit isang biyahe ay may malaking epekto sa kakayahan ng isang pamilya na matugunan ang kanilang pang-araw-araw na pangangailangan.
Kasabay nito, binanggit ni Poe ang inDrive bilang halimbawa, na aniya ay kayang mag-operate sa maximum na komisyon na nasa humigit-kumulang 10%.
“Kung kaya ninyong ipakita na kumikita kayo sa 10%, malinaw na senyales ito na dapat nating suriin ang tamang antas ng komisyon sa bawat platform,” ani Poe, habang hinihikayat ang mga regulator at ang technical working group na muling repasohin ang mga pamantayan sa industriya.
Tiniyak din ni Poe ang pagiging patas ng proseso, at nangakong ipaaabot sa mga rider at sa publiko ang mga paliwanag ng bawat platform. “Ang sasabihin ninyo ngayon, gagawin nating information drive… kailangan maging patas sa magkabilang panig,” aniya, na binibigyang-diin ang kahalagahan ng transparency at accountability.
Sa pagtatapos ng kanyang interpelasyon, inatasan ni Poe ang lahat ng TNVS companies—lalo na ang Joyride, Angkas, Move It, Grab, at inDrive—na magsumite ng detalyadong datos hinggil sa kanilang commission structures, incentive systems, at benepisyo para sa mga rider.
Dagdag niya, palalawakin pa sa mga susunod na pagdinig ang pagsusuri sa iba pang delivery platforms tulad ng Foodpanda at Lalamove, kasunod ng mga ulat ng kaparehong isyung kinakaharap ng mga manggagawa sa mga sektor na ito.
