PFF Futsaliga Matchday 5: Buhay na buhay ang House of Futsal habang umiinit ang laban para sa semis

MULING nabuhay ang Philsports Arena bilang “House of Futsal” ng bansa nang bumalik ang PFF Futsaliga na inihahandog ng Philippine Sports Commission (PSC) nitong nakaraang weekend, kung saan ang Matchday 5 ay naghatid ng matitinding aksyon sa lahat ng dibisyon habang unti-unting luminaw ang karera patungo sa semifinals.

Matalas at determinado ang ipinakitang laro ng mga youth at senior clubs, na nagbunga ng malalaking panalo, dramatikong comeback, at mga pahayag na performance na nagpapakita ng patuloy na paglago ng kompetisyon at lalim ng liga.

Binigyang-diin ni PFF President John Anthony Gutierrez ang kahalagahan ng malakas na pagbabalik ng liga sa Philsports Arena, na tinaguriang House of Futsal ng bansa.

“Ipinapakita ng PFF Futsaliga na tunay na buhay ang House of Futsal, kung saan ang mga manlalaro, koponan, at fans ay lubos na nakatuon sa kompetisyon habang papasok ito sa mahalagang yugto. Habang umiinit ang laban para sa semifinals, nakikita natin ang kalidad, passion, at pagiging kompetitibo na huhubog sa kinabukasan ng futsal sa Pilipinas,” ani Gutierrez.

“Sa patuloy na suporta ng Philippine Sports Commission sa ilalim ng matatag na pamumuno ni Chairman Pato Gregorio, ang platform na ito ay hindi lamang nagpapanatili ng momentum kundi nagpapataas din ng antas sa lahat ng lebel, na naglalapit sa atin sa pagbuo ng kumpletong futsal ecosystem sa bansa.”

Binuksan ng Beach Hut FC ang Matchday 5 sa dominan­teng paraan matapos tambakan ang Sporting QC, 7–0, na pinangunahan ng limang goal ni Filipinas U17 standout Sofhia Muros, na ginawaran bilang Bootcamp Player of the Match.

Sumunod ang Silangan FC Cainta sa pamamagitan ng 5–0 default win laban sa EMA Bulacan Highlanders upang makuha ang kanilang ikaapat na panalo, habang naputol ng Star FC ang tatlong sunod na talo sa pamamagitan ng 3–0 panalo kontra Antipolo City FC. Binigyang-diin ni team captain Ekang Saromines ang tiwala at organisasyon bilang susi sa kanilang pagbawi.

Sa inaabangang laban ng mga unbeaten teams, nanaig ang PasigLaban laban sa Nemesis FA, 2–1, upang manatiling perpekto sa limang panalo. Nagpasiklab si Dhea Nicolly Cebe ng dalawang goal, kabilang ang game-winning goal sa ika-25 minuto matapos makapag-equalize ang Nemesis, kaya lalo nilang pinatatag ang kanilang puwesto sa itaas ng standings.

Ibinahagi ni Coach Michael Eguillos ang kanilang attacking approach: “Yung ginawa naming plan is more of attacking kami. Puro forward passes at puro penetrating sa depensa ng kalaban.”

Dahil dito, nanguna ang PasigLaban sa talaan na may 15 puntos, habang tabla sa ikalawa hanggang ikaapat ang Beach Hut, Silangan, at Nemesis Gaia na may tig-12 puntos. Nasa likod pa rin ang Star na may anim na puntos ngunit nananatiling may tsansa sa semis.

Sa boys U17 division, umapaw sa goals ang laban nang talunin ng EMA Bulacan Highlanders ang Nemesis FA, 8–6, sa huling dalawang minuto, kung saan umiskor ng apat na goal si captain Christian Vidal. Ipinagpatuloy naman ng Star FC ang kanilang undefeated run matapos talunin ang PasigLaban, 8–1, sa tulong ng apat na goal ni Ramil Fraga.

Nagtabla sa 6–0 ang Paul Stiga Academy (PSA) at Sporting QC, kung saan muling nagningning si Jon Marl Rebanal. Samantala, pumasok sa top four ang Antipolo City FC matapos talunin ang Manila Futsal Team, 5–1, na pinangunahan ng hat trick ni JM Bautista.

Nanatiling walang talo ang Star FC at siguradong papasok sa semifinals na may perpektong 15 puntos. Malakas ang tsansa ng PSA na makapasok sa Cup rounds na may 12 puntos, habang ang anim na iba pang koponan ay may laban pa rin para sa semis.

Sa Women’s Division, nagpakitang-gilas ang Azkals Development Club (ADC) sa 7–2 panalo laban sa Philippine Women’s University (PWU), sa pangunguna ni dating Filipinas standout Dai Dolino.

Nagpakita ng tibay ang University of Makati (UMak) matapos bumawi mula sa 0–2 deficit upang itabla ang laban sa Beach Hut FC, 2–2. Umiskor si Lizzie Torre ng equalizer, habang si goalkeeper Junah Cuerpo ay nakapagligtas ng mahalagang save sa huling minuto laban sa malakas na tira ni Taif Salama.

Ipinagpatuloy ng Enderun College ang kanilang magandang kampanya sa 3–0 panalo laban sa Forza, habang nanatiling dominante ang Far Eastern University (FEU) Lady Tamaraws matapos tambakan ang Azzurri, 7–0. Muling nanguna si Lenlen Cristobal sa pamamagitan ng hat trick at nakuha ang kanyang ikaapat na Bootcamp Player of the Match award.

Nangunguna ang FEU sa standings habang kasunod ang Beach Hut na may 13 puntos, at lima pang koponan ang may tsansa sa semis.

Sa men’s division, nanatiling walang talo ang ADC matapos talunin ang PUP Radicals, 4–2, sa tulong ng dalawang goal ni Christian Gabriel Vendiola.

Nagpakitang-lakas ang Enderun College sa isa sa pinaka-dominanteng panalo ng matchday matapos durugin ang Sporting QC, 11–1, kung saan umiskor ng apat na goal si Zymel Moreno.

Bumawi naman ang Tondo FC sa impresibong paraan matapos talunin ang University of Makati, 7–3, sa likod ng pitong goal ni MJ Libre.

Ayon kay Libre, mahalaga ang panalong ito matapos ang sunod-sunod na pagkatalo: “Pinakita lang namin na mas matanda kami sa kanila,” biro niya, patungkol sa “sibling rivalry” ng dalawang koponan.

Tinapos ng Philippine Women’s University ang matchday sa disiplinadong 2–0 panalo laban sa University of Asia and the Pacific, kung saan nagningning si goalkeeper Lourence Dalumpines sa pagpapanatili ng clean sheet.

Matapos ang limang matchdays, pumasok na sa kritikal na yugto ang PFF Futsaliga, kung saan nagsisiksikan ang mga koponan para sa puwesto at momentum papunta sa huling bahagi ng elimination round.

Patuloy na nagsisilbing puso ng futsal sa Pilipinas ang House of Futsal—kung saan lalong tumitindi ang kompetisyon, lumalalim ang rivalries, at mas nagiging malinaw ang daan patungo sa semifinals.

Dahil sa tumitinding drama, mas dumarami rin ang fans sa venue at online, kung saan umabot na sa 2.3 million views ang PFF Futsaliga Facebook page sa loob lamang ng tatlong weekends. (PSC/HNT)