HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
ALIW panoorin ang sagupaan nina Kim Chiu at Sofia Andres. Aakalain mong makatotohanan ang sabunutan at pagpapalitan ng masasakit na salita.
Kinasabikan online ang mainit na bangayan at sabunutan nina Kim at Sofia sa primetime teleserye ng ABS-CBN na The Alibi: Ang Buong Katotohanan sa episode noong Martes (Abril 7).
Malupit ang komprontasyon ng dalawa sa harap ng publiko matapos ipagsigawan ni Claudia (Sofia) ang pagiging kabit ni Stella (Kim) ng kanyang asawang si Vincent (Paulo Avelino). Bilang ganti, inilantad naman ni Stella ang panloloko ni Claudia na ibinulgar ang lihim na relasyon nito kay Walter (Sam Milby), na best friend ng kanyang mister.
Pinagpiyestahan ng fans ang sagutan at eskandalo ng parehong palaban na mga babae, na nauwi sa pagbuhos ni Claudia ng kape kay Stella at tuluyan nang nagsabunutan ang dalawa.
“Malandi ka!” galit na sigaw ni Claudia.
Bilang resbak, bumanat si Stella at sinabing, “Pareho tayong kabit dito. Mas malala ka pa nga dahil kinalantari mo ’yung best friend ng asawa mo.”
Hindi lang itong tagpong ito ang mapapanood sa The Alibi dahil lalo pang titindi ang tensyon sa mga susunod na episode matapos ang rebelasyon na naging mag-jowa sina Stella at Walter bago maganap ang misteryosong pagpatay kay Walter.
Napapanood ang The Alibi: Ang Buong Katotohanan sa ABS-CBN sa ALLTV2, mula Lunes hanggang Biyernes, 8:45 pm..
