HATAW! D'yaryo ng Bayan hatawtabloid.com
PINANGUNAHAN ni Movie and Television Review and Classification Board (MTRCB) Chairperson at CEO Lala Sotto ang panunumpa sa tungkulin ng bagong Board Member, noong Martes, Disyembre 16, 2025, sa MTRCB Liezl Martinez Hall, Quezon City.
Nanumpa si Nestor Cuartero, isang beterano at multi-awarded na mamamahayag na may ilang dekadang karanasan sa industriya ng media. Naging guro ng mahigit 20 taon sa Department of Communication and Media Studies ng Faculty of Arts and Letters ng University of Santo Tomas.
Dala niya sa MTRCB ang malawak na karanasan at kaalaman sa operasyon ng mga sinehan at ugnayan sa industriya ng pelikula.
Tiwala si Sotto na ang bagong miyembro ay magbibigay ng mahahalagang pananaw at higit pang magpapatibay sa mandato ng ahensiya.
“Kompiyansa akong makatutulong sila sa aming mandato lalo na pagdating sa pakikipagtulungan sa industriya, at mapataas pa ang tiwala ng publiko,” ani Sotto. “We thank President Ferdinand R. Marcos, Jr. for entrusting the MTRCB with leaders who bring integrity, expertise and a deep understanding of the media and film industry.”
Noong Miyerkoles naman ay nanumpa rin si Maria Rosario Garcia Fabregas bilang bagong Board Member din ng MTRCB.
Batay sa appointment papers na nilagdaan ng pangulo noong Martes, Disyembre 2, agaran silang pinagsisimula sa trabaho basta’t makapagsumite ng kopya ng kanilang panunumpa sa tanggapan ng pangulo at sa Civil Service Commission.
Si Fabregas ay batikang mamamahayag at may dekadang karanasan sa pagbabalita at komunikasyon.
Inaasahang mas palalakasin ng kanilang mga kakayahan sa pagbuo ng kwento at mga propesyonal na pamantayan sa media ang kapasidad ng Ahensya sa pagbibigay ng angkop na klasipikasyon sa pelikula at telebisyon, lalo na sa lumalawak na impluwensiya ng modernong teknolohiya.
Nagpahayag ng kumpiyansa si Sotto sa mga bagong Board Member at binigyang-diin ang halaga ng kanilang kontribusyon sa mandato at misyon ng MTRCB.
