HATAW! D'yaryo ng Bayan hatawtabloid.com
LUNGSOD NG MARAWI — Sa pakikipagtulungan ng Philippine Sports Commission (PSC), Bangsamoro Sports Commission (BSC), at Mindanao State University (MSU), matagumpay na idinaos ang Mindanao Sports Summit sa Lungsod ng Marawi—isang makasaysayang hakbang tungo sa kapayapaan at kaunlaran ng rehiyon sa pamamagitan ng palakasan.
“Higit pa ito sa isang summit; ito ay isang kilusan tungo sa matatag at mapayapang kinabukasan ng palakasan sa ating rehiyon,” pahayag ni Atty. Paisalin P. D. Tago, CPA, Pangulo ng MSU System.
Tampok sa naturang pagtitipon ang masusing mga talakayan hinggil sa sports psychology at sports science, partisipasyon ng kababaihan sa larangan ng palakasan, mga estratehiya sa coaching at pamamahala, at ang promosyon ng palakasan sa pamamagitan ng midya—mga mahahalagang sangkap sa pagbubuo ng pangmatagalang at inklusibong sports development roadmap para sa Mindanao.
Bilang muling umuusbong na sentro ng mga oportunidad sa rehiyon, ang Lungsod ng Marawi ay muling tumatayo bilang isang lunsaran ng mga pangarap, kung saan ang palakasan ay nagsisilbing mitsa ng pag-asa, paghubog ng talento, at pagkakaisa ng mga pamayanan sa buong Mindanao.
“Ang Marawi ay lupain ng pangako, at kami ay nakatuon sa patuloy na pagsuporta sa kabataan, mga atleta, at sa buong komunidad nito sa bawat yugto ng kanilang paglalakbay,” ayon kay PSC Chairman Patrick “Pato” Gregorio.
Higit pa sa mga sesyon, itinampok din ng summit ang mayamang kultura ng Marawi—ang matibay nitong pananampalataya, likas na pagkamalikhain, at di-matutumbasang katatagan ng diwa ng mga mamamayan.
Ang pagsasanib ng tradisyon at palakasan ay naghatid ng makapangyarihang mensahe: na ang kapayapaan ay hindi lamang isang pangarap, kundi isang sama-samang layuning natatamo sa pamamagitan ng sigasig at makabuluhang pagkilos.
“Ang okasyong ito ay higit pa sa isang pagpupulong ng mga kaisipan. Isa itong pagdiriwang ng pagkakaisa, katatagan, at iisang layunin ng lahat ng naniniwala sa kapangyarihan ng palakasan upang baguhin ang mga buhay at komunidad,” pahayag ni Bangsamoro Sports Commission (BSC) Chairperson Arsalan Diamaoden.
Kabilang sa mga dumalo sa pagtitipon sina BSC Executive Director Salihwardi Alba, MSU College of Sports, Physical Education and Recreation (SPEAR) Dean Mirian Aman, at Philippine Sports Institute representative Pearl Managuelod.
Nagsilbi namang mga tagapagsalita sina Karate Pilipinas President Richard Lim, Pilipinas Sepak Takraw Federation Head Karen Caballero, Association of Boxing Alliances in the Philippines Secretary General Marcus Manalo, Philippine Amateur Baseball Association Deputy Secretary General Propesor Francis Diaz, PSC Chief of Staff Propesor Loujaye Sonido, at PSC Media Consultant June Navarro.
Naging mahalagang plataporma rin ang summit para sa mas malalim na kolaborasyon, kung saan nagtipon ang mga kinatawan mula sa mga lokal na pamahalaan, mga institusyong pang-edukasyon, mga organisasyong pampalakasan, at mga sektor ng civil society.
Sama-sama nilang pinagtibay ang kapangyarihan ng palakasan bilang instrumento ng paggaling, pagkakaisa, at inspirasyon—na ang lakas ay nagiging pagkakaisa, at ang pagkakaisa ay nagiging daan tungo sa kapayapaan. (PSC MCO/HNT)
#GrassrootsToGold
#GoldToGreatness
#HappyAtletangPinoy
