ISANG lalaki ang nasawi habang agad namang naaresto ang suspek matapos ang walang pakundangang pamamaril na naganap sa Brgy. Cacarong Bata, Pandi, Bulacan kamakalawa ng gabi.
Sa ulat ni PLt. Colonel Manuel C. De Vera Jr, hepe ng Pandi MPS, batay sa imbestigasyon ay nagkaroon ng mainitang pagtatalo ang biktima at ang suspek dahil sa alitan na may kinalaman sa pamilya.
Sa gitna ng komosyon, napag-alamang matapos saktan ng biktima ang kinakasama ng suspek, agad kumuha ng improvised shotgun ang huli at binaril ang biktima bago tumakas.
Kinilala ang biktima na si Alias JL, 28, residente ng nasabing barangay, na idineklarang dead on arrival (DOA) ng manggagamot matapos magtamo ng malubhang tama ng bala sa mukha at balikat.
Kinilala naman ang suspek na si Alias Mon, 25 taong gulang na naaresto malapit sa exit ng Padre Pio Pabahay at narekober din sa kanyang tahanan ang ginamit na improvised shotgun sa mabilis na isinagawang hot pursuit operation ng mga tauhan ng Pandi MPS.
Ang naarestong suspek ay nasa kustodiya na ng Pandi MPS at kasalukuyang inihahanda ang kaukulang kasong kriminal laban sa kanya.
Ayon kay PColonel Angel L Garcillano, provincial director ng Bulacan PPO, hindi nila kukunsintihin ang anumang uri ng karahasan sa lalawigan at ang mabilis na pagkakaaresto sa suspek ay patunay ng maagap na aksyon ng kapulisan upang maibigay ang hustisya sa biktima at katahimikan sa komunidad. (MICKA BAUTISTA)
