SA PATULOY na pagpapatupad ng gera ni Philippine National Police (PNP) Chief, Gen. Nicolas Torre III,
tatlong high value drug pushers ang nadakip ng mga tauhan ng Police Drug Enforcement Group (PDEG) sa isinagawang buybust operation na nagresulta sa pagkakasamsam ng illegal drugs na aabot sa higit P4 milyon sa Marikina City kahapon ng madaling araw.
Ayon kay PNP-DEG Director PBGen. Edwin Quilates, nahaharap sa kasong paglabag sa RA 9165 ang mga suspek na sina alyas Jolly, 27 anyos; alyas Mark, 27, at alyas Ashley, 21.
Batay sa report, dakong 4:00 ng madaling araw nang ikasa ang buybust operation laban sa mga suspek sa Marikina Heights, Marikina City.
Nakompiska ng mga awtoridad ang nasa 3,239 gramo ng marijuana kush at 30 gramo ng marijuana dried leaves na may total standard drug price na aabot sa P4,862,100 at mga non-drug evidence.
Dinala na sa SOU NCR PNP-DEG Office sa Camp Bagong, Diwa, Taguig City ang mga suspek para sa dokumentasyon at disposisyon habang isinumite sa PNP Forensic Group sa Camp Crame, ang mga illegal drugs para sa laboratory examination.
“This accomplishment is a testament to your dedication and unity, which strengthens our campaign against illegal drugs and our responsibility to protect every Filipino community,” ani Quilates. (ALMAR DANGUILAN)
