Onsehan sa droga  
Bebot todas sa tandem

PATAY ang isang 34-anyos babae nang pagbabarilin ng riding-in-tandem sa Valenzuela City kamakalawa ng gabi.

Dead on the spot ang biktima makaraang paulit-ulit na paputukan ng mga hindi kilalang suspek bandang 6:00 ng gabi sa panulukan ng McArthur Highway at P. Bautista St., Brgy. Marulas, ng nabanggit na lungsod.

Agad na tumakas ang mga suspek nang makitang bumulagta ang biktima sa kalsada.

Ayon kay PMaj. Randy Llanderal, hepe ng Public Information Office, Valenzuela Police Station, may kikitain umano sa nabanggit na lugar ang biktima nang biglang ikutan ng riding-in-tandem sa pinaputukan nang sunod-sunod.

Aabot sa apat na tama ng bala ng baril ang tumama sa iba’t ibang bahagi ng katawan ng  biktima.

Sa imbestigasyon ng pulisya, nabatid na dati nang may kaso ang biktima kaugnay ng ilegal na droga.

Onsehan sa ilegal na droga ang tinitingnang motibo sa krimen.

Sa pahayag ng dating live-in partner ng biktima, bago mangyari ang insidente, sinundo ng isang alyas Jon ang babae.

Dagdag ni Lladeral, may persons of interest na sila ngunit hindi pa maaaring ibunyag ang pagkakakilanlan.