POSIBLENG hindi matuloy ang nakatakdang voter registration na mag-uumpisa sa 1 Hulyo 2025 bilang paghahanda sa 2025 Barangay and Sangguniang Kabataan Elections (BSKE) na nakatakdang idaos sa 1 Disyembre 2025 dahil sa mga panukalang ipagpaliban ang huli.
Kinompirma kahapon ni Commission on Elections (Comelec) Chairman George Erwin Garcia na posibleng magpasya silang ipagpaliban ang voter registration.
Kasunod ito nang napipintong pagpapalawig sa termino ng mga barangay at SK officials at panukalang ipagpaliban ang halalan.
Sinabi ni Garcia na dapat maunawaan nang lahat na ito ay isang political decision na hindi maaaring pakialaman ng Comelec, lalo ng kanilang legislative department.
Aniya, igagalang nila ang desisyon at tatalima sila sakaling matuloy ang panukalang pagpapaliban ng halalan.
Hihintayin rin aniya nila ang desisyon ni Pang. Ferdinand Marcos Jr., kung aaprobahan o ibi-veto ang naturang panukala.
Ang BSKE ay nakatakda iraos sa 1 Disyembre 2025.
