Sa Iloilo
JEEP TUMAOB 9 SUGATAN

SUGATAN ang siyam katao nang tumaob ang isang pampasaherong jeep sa bayan ng Leon, sa lalawigan ng Iloilo, nitong Huwebes, 8 Mayo.

Ayon kay P/Lt. Mark Cortez, deputy chief ng Leon MPS, pauwi na sa Brgy. Ingay mula sentro ng bayan nang maganap ang aksidente.

Lulan ng jeep ang sampung pasahero at tumigil sandali sa Bgry. Cagay upang maghatid ng mga sako ng bigas at feeds ng mga hayop.

Ani P/Col. Cortez, binabagtas ng jeep ang pataas na kalsada nang bigla itong umatras pababa.

Nang tangkain ng driver na kinilalang si Jose Caumban, na magmaaniobra patagilid bigla itong tumaob.

Dinala ang anim na sugatan sa rural health center ng Leon at nilapatan ng lunas bilang mga outpatient, habang dinala ang dalawa sa Aleosan District Hospital sa kalapit na bayan ng Alimodian, Iloilo.

Samantala, dinala ang isa pang sugatang pasahero sa Western Visayas Medical Center, sa lungsod ng Iloilo.