Zsa Zsa maligaya sa simpleng buhay nila ni Architect Conrad

MA at PA
ni Rommel Placente

KAHIT minsan ay may pinagdaanan ang relasyon ni Zsa Zsa Padilla sa longtime partner nito na si Architect Conrad Onglao, nalagpasan naman nila ito at masayang namumuhay sa Farm Esperanza sa Lucban Quezon. 

Madalas maipakita ng singer-actress sa kanyang vlog ang simple pero tahimik niyang buhay kapag nasa probinsiya. Kaya naman nang matanong ang tungkol sa kasal ay wala na raw itong plano. Tama na raw ang maraming taon nilang pagsasama. 

Sey ng singer-actress, okay na sila ni Conrad sa sitwasyon nila ngayon at pakiramdam nila ay  hindi na para sa kanila ang tungkol sa kasal dahil secured naman na sila sa kanilang buhay at kani-kanilang career.  Maayos din ang kanilang pagsasama kahit na walang marriage contract.

Pero kwento niya, gusto ni Conrad na magpatayo uli ng bahay para sa kanilang dalawa at isang beach house. Ngunit mukhang hindi rin ito okay kay Zsa Zsa dahil para sa kanya, okay na ang tinitirhan nila ngayon.

Samantala, ipinagdiriwang ni Zsa Zsa ang kanyang 40 years sa showbiz kaya naman magkakaroon siya ng malaking concert na may titulong Through The Years sa May 17 sa Samsung Performing Arts Theater.

Kasama bilang guests ang mga anak na sina  Karylle at Zia Quizon, pati rin sina  Erik Santos at Gary Valenciano.