Willard Cheng sasabak sa Agenda ng Bilyonaryo News Channel 

SHOWBIZ KONEK
ni Maricris Valdez

MAKAKASAMA na nina Korina Sanchez-Roxas at Pinky Webb ang batikang mamamahayag na si Willard Cheng sa paghahatid ng pinakabagong balita at masusing pagsusuri ng mga kaganapan sa pandaigdigang antas sa Bilyonaryo News Channel. 

Magiging co-anchor na nga si Willard ng  pangunahing primetime newscast, ang Agenda. 

Mayroong 20 taon ng malawak na karanasan sa pag-uulat si Cheng na kumober sa Malacañang sa ilalim ng tatlong pangulo at nag-ulat sa mga pangunahing political beats, kabilang ang Senado, Kamara, Comelec, Department of Foreign Affairs (DFA) at marami pang iba kabilang ang pag-uulat sa mga pagbisita ng mga pangulo at pandaigdigang summit.

Kilalang-kilala si Willard sa pagbibigay ng mga mahalagang balita at sa kanyang political at research expertise na nagpapadali sa mga komplikadong isyu sa politika at diplomasya para sa mga manonood. Ang komprehensibong live reporting niya sa pagbisita ni Pope Francis sa Pilipinas noong 2015 ay nakakuha ng malawak na pagkilala, dahil hindi lamang siya nag-ulat ng mga kaganapan kundi nagbigay din ng mahahalagang pananaw tungkol sa Santo Papa at sa Simbahang Katoliko, na nakaeengganyo sa mga manonood sa mas malalim na emosyonal na antas.

Dalawang beses ding  napili bilang fellow ng prestihiyosong International Visitor Leadership Programng U.S. Department of State si Cheng. Nagtapos si Willard sa Ateneo de Manila University at Saint Jude Catholic School.

Kaya tutukan ang Bilyonaryo News Channel na libreng mapapanood sa BEAM TV 31, cable television sa Sky Cable 33, Cignal Channel 24, Converge 74, at sa digital media sa Cignal Play at sa social media pages @BNC sa Facebook at YouTube.