HATAW! D'yaryo ng Bayan hatawtabloid.com
ARESTADO ang isang lalaking huli sa aktong nagbubuo ng isang improvised firearm sa kahabaan ng Nieto St., sa Paco, lungsod ng Maynila, nitong Sabado, 22 Marso.
Kinilala ng Manila Police District (MPD) ang suspek na si John Rixie Maage, 25 anyos, miyembro ng Sputnik Gang.
Ayon sa ulat ng pulisya, nagpaptrolya ang mga pulis sa Syson St., nang lapitan sila ng isang lalaking residente at ipinaalam ang isang lalaking hinihinalang nag-a-assemble ng pen gun sa Nieto St.
Ipinaalam ng lalaki na ang suspek ay nakasuot ng pulang shorts, puting kamiseta, at may mga tattoo sa kaniyang braso.
Nagresponde ang mga awtoridad sa tinukoy na lugar at doon nila nakita ang lalaking tumugma sa paglalarawan ng residente.
Nang lapitan ang suspek, doon nila nahuli sa akto ang ginagawa niyang pagbubuo ng pen gun na hudyat upang dakpin siya ng mga pulis.
Nakompiska mula sa pag-iingat ng suspek ang pen gun.
Nahaharap ang suspek sa kasong paglabag sa RA 10591 o Comprehensive Firearms and Ammunition Regulation Act kaugnay sa BP 881 o Omnibus Election Code of the Philippines.
