HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
MATAPOS maglabas ng tila sama ng loob ni direk Lino Cayetano noong Lunes ukol sa hindi nila pagkakaunawaan ng kapatid na si Senator Alan Peter Cayetano kinabukasan ay napalitan naman iyon ng kasiyahan.
Ang dahilan, kinilala ng Korte ang pagiging residente nila ng Unang Distrito ng (Taguig-Pateros).
Isa kasi sa ibinabato kay direk Lino ay ang hindi raw siya legit na naninirahan sa 1st District ng Taguig-Pateros.
Ibinasura pa noon ng Commission on Elections (Comelec) ang aplikasyon ni direk Lino na ilipat ang kanyang voter registration mula sa congressional District 2 sa District 1 ng lungsod.
Pero agad namang napatunayang legit silang residente ng kanyang asawang si Fille Cayetano sa 1st District ng Taguig-Pateros na kumakandidato siya bilang kongresista.
Sa paglabas ng desisyon ng korte nagbigay ng saloobin si direk Lino sa pamamagitan ng kanyang socmed acct. “Taguig Court Affirms Residence of Spouses Lino and Fille Cayetano in the First Disttrict of Taguig-Pateros.”
“Lubos naming ipinagpapasalamat na kinilala ng Korte ang katotohanang kami ay tunay na residente ng Unang Distrito ng (Taguig-Pateros).
“Malugod naming tinatanggap ang desisyon ng Korte ng Taguig na pinagtitibay ang aming paninirahan sa Barangay Ususan at kinikilala ang aming Karapatan bilang mga lehitimong residente at rehistradong botante ng Unang Distrito ng Taguig-Pateros.
“Ang hatol na ito ay hindi lamang nagtataguyod ng aming constitutional na karapatang bumoto kundi pati na rin ang pangunahing prinsipyo na ang bawa’t mamayan ay may kalayaang pumili ng kanilang tirahan.
“Ang tagumpay na ito ay hindi lamang para sa amin kundi para rin sa bawa’t botante na may karapatang lumahok sa demokratikong proseso nang hindi pinagdududahan o ipinagkakalat.
“Kinilala rin ng Comelec ang pagiging lehitimo ng aming kandidaduta na nagsisiguro na ang aking pangalan ay nararapat na kasama sa opisyal na balota. Isa itong patunay ng aming dedikasyon na maglingkod sa Taguig at pateros nang may integridad at tapat paninindigan.”
