NASAKOTE ng mga awtoridad ang lima-kataong pawang pinaghahanap ng batas sa isinagawang manhunt police operations hanggang nitong Linggo ng umaga, 10 Nobyembre, sa iba’t ibang lugar, sa lalawigan ng Bulacan.
Sa ulat na isinumite kay P/Col. Satur Ediong, provincial director ng Bulacan PPO, matagumpay na naaresto ng tracker team ng San Jose Del Monte CPS ang Provincial Top 3 Most Wanted Persons na kinilalang si alyas Tatay Pong, 52 anyos, taxi driver, residente sa Brgy. San Pedro, lungsod ng San Jose del Monte.
Dinakip ang akusado sa bisa ng warrant of arrest na inilabas ni Presiding Judge Ma. Cristina Juanson, ng San Jose del Monte RTC Branch 5-FC para sa dalawang bilang ng kasong Qualified Rape of a Minor, dalawang bilang ng kasong Qualified Rape by Sexual Assault, at dalawang bilang ng kasong Acts of Lasciviousness kaugnay sa Section 5(b) ng RA. 7610 na walang inirekomendang piyansa.
Samantala, nasakote ang apat pang indibiduwal na pinaghahanap ng batas sa bisa ng warrant of arrest sa ikinasang mga manhunt operations ng tracker teams mula sa San Jose Del Monte CPS, Malolos CPS, Sta. Maria MPS, at Calumpit MPS.
Kasalukuyang nasa kustodiya ng kani-kanilang arresting police station ang mga suspek para sa kaukulang disposisyon. (MICKA BAUTISTA)
