HATAW! D'yaryo ng Bayan hatawtabloid.com
NAKATAKDANG ideklara ng Quezon City Anti-Drug Abuse Advisory Council (QC-ADAAC) na drug-cleared ang lima pang barangay sa Lungsod.
Sa pagdiriwang kahapon ng International Day Against Drug Abuse na ginanap sa Philippine Public Safety College sa QC, sinabi ni QC-ADAAC Co-Chairman at Vice Mayor Gian Sotto na sa ngayon ay bumababa na ang bilang ng mga drug addict at drug pusher sa Lungsod.
Ito aniya ay resulta ng malawakang information campaign at mga drug prevention program ng lokal na pamahalaan lalo ang pagtugon sa pagbibigay ng trabaho sa mga mamamayan.
Naging posible aniya ito dahil sa pakikipagtulungan ng barangay, mga eskuwelahan at iba pang stakeholder na mulat na rin sa negatibong epekto ng illegal drugs.
Paliwanag ni Sotto, bagamat hindi maitatanggi na mayroon pa rin nagkalat na ilegal na droga sa lungsod pero batay sa talaan ng Quezon City Police District (QCPD), karamihan sa mga nahuhuli at namo-monitor na mga pusher ay pawang taga-ibang lugar o hindi residente sa Quezon City.
Pansamantalang hindi tinukoy ni Sotto kung anong mga barangay ito dahil hihintayin pa ang rekord na manggagaling sa Anti-Drug Abuse Council (ADAC).
Una nang idineklang drug-cleared ang 94 barangays sa buong Quezon City. (ALMAR DANGUILAN)
