Brazil nanaig vs Netherlands sa VNL Week 3
HANDA nang hatawin ang bola sa opensa ni Darlan Ferreira Souza (28) ng Brazil sa taas kamay na depensa nina Maarten Van Garderen (3) at Fabian Plak (8) ng Netherlands. Nasayang ang 38 puntos ni Nimir Abdel-Aziz (14) ng Netherlands sa unang kabiguan. (HENRY TALAN VARGAS)
PASAY CITY – Bumangon ang Brazil mula sa first-set loss para talunin ang Netherlands sa pagsisimula ng Volleyball Nations League (VNL) Men’s Week 3 sa SM Mall of Asia (MOA) Arena noong Martes ng gabi.
Gumawa si Darlan Ferreira Souza, may 20 attacks, tatlong blocks, at tatlong service aces para pangunahan ang Brazilians sa panalo, 24-26, 25-23, 31-29, 25-20.
Nag-ambag si Lucas Saatkamp ng 12 puntos, habang umiskor si Flavio Resende ng 11 puntos, kabilang ang anim na blocks.
Sa panig ng Netherlands nanguna si counter spiker Nimir Abdel-Aziz na may 38 puntos kabilang ang limang aces.
Nagdagdag si Maarlen Van Garderen ng 15 puntos habang sina Gijs Jorna, Fabian Plak, at Michael Parkinson ay umiskor ng tig-apat na puntos.
