ARESTADO ang isang lalaki na sinabing sangkot sa pagtutulak ng ilegal na droga matapos kumagat sa ikinasang buybust operation ng pulisya sa Navotas City.
Ayon kay Navotas City police chief P/Col. Mario Cortes, nakatanggap ang mga operatiba ng Station Drug Enforcement Unit (SDEU) hinggil sa pagbebenta ng droga ni alyas Jimmy, 51 anyos, residente sa nasabing lungsod kaya isinailalim ito sa validation.
Nang makompirma na positibo ang ulat, ikinasa ng SDEU sa pangunguna ni P/Capt. Genere Sanchez ang police operation laban sa suspek at sa pamamagitan ng isang undercover police ay nagawang makipagtransaksiyon sa suspek ng P500 halaga ng droga.
Matapos tanggapin ng suspek ang marked money mula sa pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba dakong 1:05 ng madaling araw sa Dalagang Bukid St., Brgy. NBBS Dagat-dagatan.
Ani Capt. Sanchez, nakompiska nila sa suspek ang nasa 4.32 gramo ng hinihinalang shabu, may standard drug price value na P29,376.00 at buybust money.
Mahaharap ang suspek sa kasong paglabag sa RA 9165 o Comprehensive Dangerous Drug Act of 2002. (ROMMEL SALES)
