HATAW! D'yaryo ng Bayan hatawtabloid.com
MULING NAARESTO ang isang tulak ng ilegal na droga na itinuturing bilang high value individual (HVI) sa ikinasang buybust operation ng pulisya sa Valenzuela City, kamakalawa ng gabi.
Kinilala ng bagong hepe ng Valenzuela police si P/Col. Nixon Cayaban, ang naarestong suspek na si alyas Dante Lalog, 38 anyos, ng Tañada Subd., Brgy. Gen. T. De Leon, Karuhatan.
Ayon kay Col. Cayaban, nakatanggap ng impormasyon ang mga operatiba ng Station Drug Enforcement Unit (SDEU) na patuloy ang suspek sa kanyang ng illegal drug activities kaya ikinasa nila ang bust operation laban dito.
Nang tanggapin ng suspek ang marked money mula sa pulis na nagpanggap na buyer kapalit ng isang plastic sachet ng shabu ay agad siyang dinamba ng mga operatiba dakong 5:00 pm sa Karen Avenue, malapit sa THOA basketball court sa nasabing lugar.
Nakompiska sa suspek ang nasa limang gramo ng hinihinalang shabu, may katumbas na halagang P34,000 at buybust money na isang tunay na P500 bill at 10-pirasong P1,000 boodle money.
Sa record ng SDEU, dati nang naaresto ang suspek dahil sa pagbebenta ng ilegal na droga ngunit nang makalabas ay muling ipinagpatuloy ang pagbebenta ng shabu.
Mahaharap ang suspek sa kasong paglabag sa RA 9165 o ang Comprehensive Dangerous Drug Act of 2002. (ROMMEL SALES)
