HATAW! D'yaryo ng Bayan hatawtabloid.com
DALAWANG lalaki na wanted sa kasong Rape at Homicide ang nakalawit ng pulisya sa magkahiwalay na manhunt operation sa Valenzuela City, kamakalawa ng hapon.
Sa ulat ni Valenzuela City police chief P/Col. Nixon Cayaban, dakong 3:10 pm nang maaresto ng mga tauhan ng Warrant and Subpoena Section ng Valenzuela police at Northern NCR Maritime Police Station sa joint manhunt operation sa Pitacion St., Elysian Subdivision, Brgy. Marulas, ang 39-anyos lalaking itinago sa pangalang Tiago.
Binitbit ng pulisya ang akusado sa bisa ng warrant of arrest na inisyu ni Presiding Judge Maria Nena J. Santos ng Regional Trial Court (RTC) Branch 171, Valenzuela City noong 30 Mayo 2024 para sa kasong Rape.
Nauna rito, 1:30 pm nang madakip ng mga operatiba ng Valenzuela Police Station Intelligence Section sa pangunguna ni P/Major Randy Llanderal sa manhunt operation sa M.H. Del Pilar Road, Brgy. Arkong Bato, ang isa pang akusado na si alyas Anjo, 38 anyos, ng Malabon City.
Ayon kay Major Llanderal, inaresto nila ang akusado sa bisa ng warrant na inisyu ni Acting Presiding Judge Corazon D. Soluren ng RTC Branch 170, Malabon City noong 30 Oktubre 2007, para sa kasong Homicide.
Pansamantalang nakapiit sa custodial facility unit ng Valenzuela police ang mga akusado habang hinihintay ang pagpapalabas ng commitment order mula sa korte. (ROMMEL SALES)
