SSS, Bocaue LGU lumagda sa MOA para sa social security coverage ng JO workers
IPINAHAYAG ng Social Security System (SSS) na mahigit 800 job order (JO) na manggagawa sa pamahalaang munisipyo ng Bocaue, Bulacan ang makakukuha na ng social security coverage at proteksiyon sa ilalim ng KaSSSangga Collect Program (KCP) matapos pumirma ang SSS at ang local government unit (LGU) sa isang memorandum of agreement (MOA) para sa pagpapatupad ng programa.
Ayon kay SSS Senior Vice President for Luzon Operations Group Antonio S. Argabioso, ang paglagda sa MOA ay nangangahulugan ng shared commitment ng SSS at ng LGU na magbigay ng social security sa mga JO worker sa gobyerno.
Sinabi ni Argabioso, ang munisipyo ng Bocaue ay magpapadali sa pagpapatala ng mga JO workers bilang self-employed na miyembro ng SSS, na hindi kalipikado para sa coverage ng GSIS.
“Bilang awtorisadong collecting partner, ang Bocaue LGU ay magbabawas ng buwanang Social Security (SS) at Employees’ Compensation (EC) na kontribusyon ng mga manggagawang JO mula sa kanilang mga suweldo at ire-remit ang nasabing mga kontribusyon sa SSS branch,” dagdag niya.
Binanggit ni Argabioso na gagawin ng SSS ang on-site registration para sa lahat ng kalipikadong JO personnel, kabilang ang pagsasagawa ng information seminars upang bigyang-diin ang halaga ng aktibong membership sa SSS upang mapakinabangan nila ang iba’t ibang benepisyo at pribilehiyo ng SSS.
Hinikayat din niya ang lahat ng permanenteng empleyado ng LGU na ipagpatuloy ang kanilang mga kontribusyon sa SSS bilang mga boluntaryong miyembro, na nagpapahintulot sa kanilang mga kontribusyon na umayon sa kanilang mga kagustuhan.
“Inaasahan ko ang mga taon ng matagumpay na pakikipagtulungan sa SSS, dahil ang parehong mga organisasyon ay nagtatrabaho para sa ikabubuti ng kapakanan ng ating mga manggagawang JO at kanilang mga pamilya,” pagtatapos ni Bocaue Municipal Mayor Eduardo Villanueva, Jr., pagkatapos ng ceremonial signing. (MICKA BAUTISTA)
