Nagtapon ng basura sa bawal na lugar
MISTER TIKLO SA DALANG SHABU

BINITBIT ng pulisya sa selda ang isang lalaki matapos mabisto ang dalang mahigit P29,000 halaga ng droga nang tangkain silang takasan makaraang masita dahil sa pagtapon ng basura sa bawal na lugar sa Caloocan City, kamakalawa ng gabi.

Ayon kay Caloocan City police chief P/Col. Ruben Lacuesta, habang nagpapatrolya ang mga tauhan ng Congressional Police Sub-Station 9 sa Bagumbong Road, Brgy. 171 na may kaugnayan sa Simultaneous Anti-Criminality and Law Enforcement Operation (SACLEO) nang maispatan ang isang lalaki na nagtapon ng basura sa ipinagbabawal na lugar, malinaw na paglabag sa Ordinance No. 0753 (Anti-Littering) ng lungsod.

Nang kanilang lapitan para isyuhan ng Ordinance Violation Receipt (OVR) ay kumaripas ng takbo ang lalaki kaya hinabol siya ng mga pulis hanggang makorner at maaresto dakong 11:51 pm.

Nang kapkapan, nakompiska sa suspek na si alyas Balong ang isang transparent plastic sachet na naglalaman ng nasa 4.4 gramo ng hinihinalang shabu, may katumbas na halagang P29,920.

Mahaharap ang suspek sa kasong paglabag sa Art. 151 of RPC at RA 9165 o Comprehensive Dangerous Drug Act of 2002. (ROMMEL SALES)