Angeline ng Cheaters tumataas ang kompiyansa kapag nagpapa-sexy

SHOWBIZ KONEK
ni Maricris Valdez Nicasio

“I feel confident when I’m sexy,” ito ang matapang na tinuran ng baguhang si Angeline Aril na bida sa latest offering ng Vivamax, ang Cheaters na mapapanood na simula Abril 2, 2024.

Ang Cheater ang unang pelikula ni Angeline at wala pa itong experience sa pag-arte. Tanging pagsali sa mga pageant, car show, modeling, at photo shoot ang mga ginagawa niya noon bukod sa pag-aaral bilang Mass Communication sa FEU.

Sinabi pa ng dalaga na wala siyang balak mag-artista pero nang dumating ang offer ng Viva sa pamamagitan ng kanyang manager na si Marissa, hindi na niya iyon pinalampas kahit pa-sexy ang role niya na first niyang gagawin.

“Dumatng po ang chance kaya pinush ko na. And very opposite ang role na ginagampanan ko sa Cheaters kaya talagang very challenging sa akin. Kabaligtaran talaga ng ugali ko ang karakter ko rito sa pelikula namin,” anang dalaga.

Aminado rin si Angeline na kabado siya nang sumalang sa shooting ng kanilang pelikula. Mabuti na lamang at mabait ang kanilang direktor na si Dustin Celestino na aniya’y tumulong sa kanya. “Tinulungan po ako ni direk Dustin at sinabihan akong, ‘kaya mo ‘yan kahit bago ka lang.’ Kaya ayun naging okey naman po.” 

At kahit ayaw mag-artista noon, nae-enjoy na niya ang ginagawang trabaho na bagamat aminadong hindi madali ang ginagawa at bago sa kanya’y nagugustuhan na niya ngayon. 

At dahil sa pagpapa-sexy, iginiit nitong, “I feel confident when I’m sexy actually.” Na dati’y kulang sa kanya dahil likas ang pagiging mahiyain.   

bibida rin sa Cheaters bukod kay Angeline sina Aerol Carmelo, Kara Fernandez, at John Mark Marcia.  

Kuwento ito nina April (Angeline Aril) at Juny (Aerol Carmelo) na naging mapusok nang magkita. Tila may elementong nagkakabit sa kanila na sa tuwing magkikita ay hindi makapagpigil. Naulit iyon ng ilang beses kahit nagkaroon na sila ng kanya-kanyang karelasyon. 

Makalipas ang ilang buwan, muli silang nagkatagpo pero talagang hindi makapagtiis na nauwi pa sa panakaw ng mga sandali. At para maitama ang mali, napagkasunduan nilang makipaghiwalay sa kanilang mga karelasyon.

Pero hindi magiging madali ang lahat kahit na maging sina April at Juny dahil masusubok naman ang tiwala at pagiging kuntento nila sa isa’t isa, kagaya ng pagsubok na pinagdaanan ng mga dati nilang nakasama.