HATAW! D'yaryo ng Bayan hatawtabloid.com
NAKATAKDANG rebisahin ng Energy Regulatory Commission (ERC) ang magiging epekto ng $3.3 bilyong liquefied natural gas (LNG) deal sa consumer prices.
Ayon kay ERC Chairperson Monalisa Dimalanta, sa kabila na ang dapat magsagawa ng review sa merger ay ang Philippine Competition Commission (PCC), ang kanyang tanggapan ay kikilos din upang pag-aralan ang magiging epekto nito sa kasalukuyan at mga susunod na power supply agreements (PSAs) ng Meralco at ang mga kilos ng players sa Wholesale Electricity Spot Market (WESM) at retail market.
Matatandaang nagsanib-puwersa ang ERC at PCC para sa pag-monitior at pag-iimbestiga ukol sa alegasyon ng anti-competitive practices sa power sector.
Ang inisyatibo ay naganap sa isinagawang 2019 Memorandum of Agreement (MOA) sa pagitan ng dalawang regulators upang matiyak ang maayos na kompetisyon sa energy industry bilang tugon sa malawakang brownout at pagtaas ng presyo sa singil ng koryente.
Layunin ng naturang joint fact-finding inquiries na matiyak at matukoy ang mga anti-competitive na nagdudulot ng perhuwisyo sa kapakanan ng mga consumer.
“There has been a standing agreement for coordinated review since 2019. We just operationalized the agreement by setting up the joint inquiry last month,” ani Dimalanta.
Iginiit ni Dimalanta, malawakan ang kakayahan ng PCC sa pagrebyu ng mga kasunduan at kilos lalo sa uncompetitive behavior patungkol sa power industry sa kanilang pakikipag-ugnayan sa ERC.
“This synergy allows our respective agencies to better fulfill our mandates and serve the Filipino public,” ani Dimalanta.
Magugunitang nagkaroon ng $3.3-billion deal sa pagitan ng Meralco PowerGen (MGen), Aboitiz Power, at San Miguel Global Power Holdings Corp. (SMGP) upang ilunsad ang kauna-unahan at most expansive na LNG terminal.
Sa sandaling mag-fully operational ang LNG facility sa Batangas ay inaasahang magsusuplay ng fuel sa mga planta na inaasahang mag-generate ng mahigit sa 2,500 megawatts (MW) ng koryente.
Sa ilalim ng kasunduan, ang MGen at Aboitiz Power ay mamumuhunan sa dalawang SMGP’s gas-fired power plants kabilang ang 1,278MW Ilijan power plant at ang bagong 1,320 MW combined cycle power facility.
Naunang nang inakusahan ng United Filipino Consumers and Commuters (UFCC) na ang naturang pagsasanib puwersa ay mauuwi lamang upang mamonopolyo ang LNG market na pahihintulutan ang mga kompanyang magtakda ng presyo na mauuwi sa mataas na singil sa presyo ng koryente. (NIÑO ACLAN)
