HATAW! D'yaryo ng Bayan hatawtabloid.com
MARIKINA CITY — Napanatili ni FIDE Master (FM) Christian Mark Daluz ang mainit na simula at pinamunuan ang Antonio “Bolok” Memorial Open Rapid Chess Tournament sa Jesus Dela Peña Covered Court sa Marikina City noong Sabado, 10 Pebrero 2024.
Si Daluz, miyembro ng University of Santo Tomas (UST) chess team sa ilalim ng gabay ng GM candidate na si Ronald Dableo ay nagwalis sa kanyang mga assignment at nakakuha ng 7.0 points para mag-uwi ng P10,000 cash prize.
“Masayang-masaya ako sa aking pagkapanalo dahil halos lahat ng nangungunang manlalaro sa Metro Manila at mga kalapit na probinsiya ay sumali sa torneo,” sabi ng 21-anyos residente ng Sampaloc, Maynila sa isang panayam noong Linggo.
Umiskor si FM Noel Dela Cruz ng 6.5 puntos habang tinapos nina GM Darwin Laylo, NM Phil Martin Casiguran, Jeremy Marticio, IM Daniel Quizon, Leonel Escote, Carlo Caranyagan, at Jonathan Jota ang torneo na may katulad na 6.0 puntos.
“Ang kaganapan ay naglalayong bumuo ng mahuhusay na nag-iisip sa pamamagitan ng pag-unawa sa mga diskarte at taktika ng chess, pagpapabuti ng mga lohikal na kakayahan at makatuwirang pag-iisip at pangangatuwiran ng mga kalahok, at pagtanim ng isang pakiramdam ng tiwala sa sarili, pagpapahalaga sa sarili at pakikipagkaibigan,” sambit ni dating National Chess Federation of the Philippines director Thaddeus Antonio “Boy Bolok” Santos, Jr.
Samantala, nanalo si WNM Antonella Berthe Racasa bilang Top Marikina Junior Chess Player award. (MARLON BERNARDINO)
