HATAW! D'yaryo ng Bayan hatawtabloid.com
ARESTADO ang isang lalaki na itinuturing na pusakal na tulak ng magkasanib na mga operatiba ng Magalang Police Station Drug Enforcement Unit (MDEU) at Provincial Drug Enforcement Unit (PDEU) ng Pampanga PPO sa isinagawang anti-drug operation. sa Magalang, Pampanga kamakalawa.
Kinilala ni PRO3 Director P/BGen. Jose S. Hidalgo, Jr., ang suspek na si alyas Fred, 45 anyos, naaresto sa buybust operation sa Barangay Lapaz ng nasabing bayan.
Nakuha sa ‘pag-iingat’ ni Fred ang kabuuang 122 gramo ng hinihinalang shabu, may Standard Drug Price na tinatayang nasa P829,600, isang kalibre .38 revolver, isang improvised handgun, at dalawang bala.
Inihahanda ang kaukulang kaso na paglabag sa RA 9165 o Comprehensive Dangerous Act of 2022 laban sa suspek para sa referral ng korte.
Pinuri ni P/BGen. Hidalgo, Jr., ang operating troops at sinabi na ang tagumpay na ito ay nagtatampok sa pangako ng mga tauhan ng PRO3 na labanan ang kalakalan ng ilegal na droga at mapanatili ang kaligtasan ng publiko sa rehiyon. (MICKA BAUTISTA)
