Sa Sta. Cruz, Laguna
Lalaki timbog sa baril, droga

ARESTADO ang isang lalaki matapos masamsaman ng hinihilang ilegal na droga at baril sa isinagawang buybust operation ng mga awtoridad sa bayan ng Sta. Cruz, lalawigan ng Laguna, nitong Martes, 7 Nobyembre.

Kinilala ang suspek na si Joel De Ocampo, residente sa Brgy. Masapang, Victoria, Laguna, at nakatala bilang street level individual na nahaharap sa mga kasong paglabag sa RA 9165 at RA 10591.

Sa ulat, dakong 4:00 pm kamakalawa nang magsagawa ng buybust operation ang mga tauhan ng Sta. Cruz MPS sa Brgy. Pagsawitan, sa nabanggit na bayan.

Nakompiska mula kay De Ocampo ang anim na maliliit na heat-sealed transparent plastic sachet ng hinihinalang shabu, may timbang na 7.37 gramo, at tinatayang nagkakahalaga ng P50, 853; P500 buybust money; isang pouch; isang caliber .38 revolver na may tatlong bala; at isang sling bag.

Kasalukuyang nakapiit sa Sta. Cruz MPS custodial facility ang suspek para sa angkop na disposisyon at dokumentasyon. (BOY PALATINO)