HATAW! D'yaryo ng Bayan hatawtabloid.com
Arestado ang 21 pasaway na indibiduwal sa Bulacan kabilang ang isang akusado na may kasong pang-aabuso sa kabataan sa patuloy na operasyon ng pulisya sa lalawigan hanggang kahapon ng umaga, Mayo 5.
Sa ulat mula kay PColonel Relly B. Arnedo, provincial director ng Bulacan PPO, ang tracker team ng Bulacan 2nd Provincial Mobile Force Company, at mga tauhan mula sa Sta Maria Municipal Police Station (MPS) ang umaresto sa akusado sa bisa ng warrant of arrest para sa paglabag sa Special Protection of Children Against Child Abuse, Exploitation and Discrimination Act (Anti Child Abuse Law) Section 5(B) ng RA 7610.
Sa kasunod na operasyon ay isa ring akusado ang inilagay sa kustodiya sa bisa ng warrant of arrest na walang itinakdang piyansa para sa paglabag sa RA 7610 ng Calumpit Municipal Police Station (MPS).
Gayundin, pito pang indibiduwal na mayroon ding warrants of arrest ang arestado sa iba’t-ibang paglabag na isinagawa ng San Ildefonso, Meycauayan, Pandi, Pulilan, at San Miguel C/MPS.
Samantala, ang Station Drug Enforcement Units mula Malolos, Meycauayan, Pandi, Bustos, Bocaue at Angat C/MPS ay inaresto ang 12 indibiduwal para sa paglabag ng sections 5 at 11 ng RA 9165 at nakumpiska ang kabuuang 43 pakete ng shabu.(Micka Bautista)
