HATAW! D'yaryo ng Bayan hatawtabloid.com
Nagbunga ang pagsisikap ng kapulisan sa Bulacan na maaresto ang isang most wanted person sa isinagawang manhunt operation sa Baliuag City kamakalawa ng umaga.
Sa ulat na ipinadala ni PLt.Colonel Julius Alvaro, hepe ng Baliuag City Police Station (CPS), kay Police Colonel Relly B. Arnedo, provincial director ng Bulacan PPO, ang nadakip ay si Lester Santos, 28, na residente ng Brgy. Sabang, Baliuag City.
Ang akusado na kabilang sa Most Wanted Person sa Baliuag City ay naaresto ng mga tauhan ng Baliuag CPS dakong alas-11:46 ng umaga sa Brgy. Pagala, sa naturang lungsod.
Ang pag-aresto kay Santos ay isinagawa sa pamamagitan ng ipinatupad na warrant of arrest na inilabas ng Regional Trial Court Branch 85, Malolos City, Bulacan kaugnay sa kasong Attempted Rape na kinakaharap nito sa hukuman.
Kasunod nito ay apat pang pugante ang arestado sa iba’t-ibang manhunt operations na inilatag ng tracker teams ng 2nd PMFC, San Jose Del Monte, at Marilao CPS.
Inaresto sila sa mga krimeng Cyberlibel, Acts of Lasciviousness, at Special Protection of Children against Child Abuse (RA 7610).
Dalawa namang tulak ng iligal na droga ang arestado sa buy-bust operations na ikinasa ng Station Drug Enforcement Unit (SDEU) ng Pandi MPS.
Nasamsam sa mga suspek ang kabuuang pitong pakete ng tuyong dahon ng marijuana, drug paraphernalia, at buy bust money.
Lahat ng nahuling suspek at akusado ay kasalukuyang nasa ilalim ng kustodiya ng kani-kanilang arresting unit/station para sa angkop na disposisyon.(Micka Bautista)
