Koleksiyon ng “BOSS” sa Taguig abot sa P4.38 B
KUMOLEKTA ang Taguig City ng aabot sa P4.38 bilyon sa kanilang Business One Stop Shop (BOSS) ngayong taon, mas malaki ito ng P1.17 bilyon sa kaparehong panahon noong 2022.
Nagresulta ng pagtaas ng koleksiyon sa pagsunod sa kautusan ni Mayor Lani “Ate” Cayetano sa paglalatag ng bagong sistema na makatutulong sa mga business owners na makapag-apply ng permits at makabayad nang mas mabilis at hassle free taxes.
Pinagsama ng Business Permits and Licensing Office (BPLO) at ng City Treasurer’s Office ang pagbabayad ng barangay fees kaya hindi na kailangang kumuha ng hiwalay na mga barangay clearance.
Sinabi ni BPLO head, Atty. Tes Veloso, ang bagong protocol sa pag-aasikaso ng mga aplikasyon ng mga taxpayer ay nagresula sa mas kakaunting requirements, at mabilis na pagpoproseso ng mga permit.
Sa ilalim ng programa ng Taguig BOSS 2023, ang mga may-ari ng mga negosyo ay puwedeng magproseso ng permit sa SM Aura Satellite Office o sa kabubukas na Convention Center sa New City Hall Building, at maaaring i-print online.
Sa bagong sistema, napapahintulutang makita ng aplikante ang kanilang billing statements sa online.
Nagpasalamat si Mayor Lani sa mga business owners “for doing business in Taguig and paying their taxes.”
Tiniyak ni Mayor Ate Lani, ang ibinabayad na mga buwis ay bumabalik sa mga tao sa porma ng serbisyo at benepisyo para sa Taguigeños. (EJ DREW)
