HINDI nakaligtas sa kamatayan ang dalawang empleyado ng Department of Agriculture – Cordillera nang banggain ang kanilang sasakyan ng isang kotse na minamaneho ng ‘nakainom’ na driver sa bayan ng Ramon, lalawigan ng Isabela, nitong Huwebes, 8 Disyembre.
Kinilala ng pulisya, ang mga biktimang sina Karen Briones at Addison Kyle La-ao, kapwa mga residente sa Itogon, Benguet.
Lumitaw sa imbestigasyon, lulan ng isang closed van na may kargang sako-sakong bigas ang mga biktima nang banggain ng humaharurot na Toyota Vios, bago sumalpok sa paparating na trailer truck, minamaneho ng isang Mark Andy Bago ng Solana, Cagayan.
Agad namatay ang mga biktima habang tumakas ang driver ng Toyota Vios na kinilalang si Allan Mark Barroza, 34 anyos, ng Brgy. Bugallon Norte, sa naturang bayan.
Samantala, dinala sa Southern Isabela Medical Center sa lungsod ng Santiago, ang sugatang driver ng van na kinilalang si Tommy Timoteo.
Nadakip ng pulisya si Barroza sa ikinasang follow-up operation ng mga awtoridad at napag-alamang nakainom habang nagmamaneho.
