HATAW! D'yaryo ng Bayan hatawtabloid.com
ARESTADO ang isang lalaki sa isinagawang hot pursuit operation ng mga awtoridad nitong Lunes, 13 Nobyembre, sa bayan ng Siniloan, lalawigan ng Laguna dahil sa insidente ng pananaga.
Kinilala ni P/Col. Randy Glenn Silvio, Acting Provincial Director ng Laguna PPO, ang suspek na si alyas Aldrin, residente sa nabanggit na bayan.
Ayon sa ulat ng Siniloan MPS, tumawag ang isang concerned citizen sa kanilang himpilan upang ipagbigay alam ang nangyaring insidente ng pananaga sa Brgy. Mayatba, sa naturang bayan dakong 12:30 pm kamakalawa.
Agad itong nirespodehan ng Siniloan MPS at sa tulong ng nagsumbong na residente ay nahuli ang suspek sa Brgy. Macatad.
Kasalukuyang nasa kustodiya ng Siniloan MPS ang suspek at nakatakdang sampahan ng kasong Frustrated Murder.
Pahayag ni P/Col. Silvio, “Sa tulong ng mga mamamayan at sa mabilis na aksiyon ng Laguna PNP ay naaresto agad ang suspek kaya ako ay nagpapasalamat sa inyo sa pagtulong ninyo sa amin upang mapanatili ang kaayusan at kapayapaan sa lalawigan ng Laguna.” (BOY PALATINO)
